घरजग्गा क्षेत्रको कुल कर्जामध्ये एनआइसी एशियाको मात्रै १३.४४% हिस्सा ! कुन बैंकको कति लगानी ?

काठमाडौं । ०८१ असार मसान्तसम्म बैंक तथा वित्तीय संस्थाहरुको घरजग्गा क्षेत्रमा कुल कर्जा लगानी ६ खर्ब ५५ अर्ब १७ करोड रुपैयाँ पुगेको छ ।

कुल घरजग्गा कर्जामध्ये १३.४४ प्रतिशत हिस्सा एनआइसी एशिया बैंकको मात्र रहेको नेपाल राष्ट्र बैंकले जनाएको छ । असार मसान्तसम्म एनआइसी एशियाको घरजग्गा क्षेत्रमा कर्जा लगानी ८८ अर्ब सात करोड रुपैयाँ रहेको छ । 

यस्तो रकम ०८० पुस मसान्तसम्म अझ धेरै थियो । पुस मसान्तमा एनआइसी एशियाको घरजग्गामा कुल कर्जा रकम ९२ अर्ब २३ करोड रुपैयाँ रहेको थियो । पछिल्लो समय बैंकले पुरानो कर्जा असुलीमा जोडतोडले लागेपछि घरजग्गा कर्जाको आकार घट्दै गएको हो ।

दोस्रो र तेस्रो नम्बरमा रहेका नबिल बैंक र ग्लोबल आइएमई बैंकको घरजगगा क्षेत्रमा क्रमशः ४९ अर्ब ४२ करोड र ४८ अर्ब ८५ करोड रुपैयाँ कर्जा लगानी रहेको छ ।

२० वाणिज्य बैंकको साढे पाँच खर्ब लगानी 

नेपालमा वाणिज्य बैंक, विकास बैंक र फाइनान्स कम्पनीले मात्र घरजग्गा क्षेत्रमा कर्जा लगानी गर्न पाउँछन् । घरजग्गा क्षेत्रमा प्रवाहित कुल कर्जामध्ये २० वटा वाणिज्य बैंकहरुको पाँच खर्ब ४० अर्ब ७४ करोड रुपैयाँ लगानी रहेको छ, जसमध्ये ३ खर्ब १६ अर्ब ९ करोड रुपैयाँ व्यक्तिगत आवासीय र दुई खर्ब २४ अर्ब ६५ करोड रुपैयाँ रियल इस्टेट कर्जा रहेको छ ।

यस्तै, सञ्चालनमा रहेका १७ विकास बैंकहरुको कुल घरजग्गा कर्जा ९१ ऋर्ब ३७ करोड रुपैयाँ रहेको छ, जसमध्ये ५७ अर्ब ९९ करोड व्यक्तिगत आवासीय घरकर्जा र ३३ अर्ब ३७ करोड रुपैयाँ रियल इस्टेट कर्जा रहेको छ ।

सञ्चालनमा रहेका १७ वटा फाइनान्स कम्पनीहरुको घरजग्गा क्षेत्रमा कुल कर्जा लगानी २३ अर्ब ६ करोड रुपैयाँ रहेको छ, जसमा १२ अर्ब ९२ करोड व्यक्तिगत आवासीय घरकर्जा र १० अर्ब १३ करोड रियल इस्टेट कर्जा रहेको छ ।

वाणिज्य बैंकहरुमध्ये घरजग्गा क्षेत्रमा सबैभन्दा कम लगानी गर्नेमा नेपाल एसबिआइ, माछापुच्छ्रे, कृषि विकास, सानिमा, सिटिजन्स, सनराइज, स्टान्डर्ड चार्टर्ड, कुमारी, हिमालय बैंक लगायत रहेका छन् । यी बैंकहरुको घरजग्गामा कर्जा लगानी २० अर्बभन्दा कम रहेको देखिन्छ ।

विकास बैंकमा मुक्तिनाथ अगाडि

घरजग्गा क्षेत्रमा सबैभन्दा धेरै कर्जा लगानी गर्ने विकास बैंकमा मुक्तिनाथ विकास बैंक पहिलो नम्बरमा रहेको छ । यो बैंकले हालसम्म घरजग्गा क्षेत्रमा २१ अर्ब ७३ अर्ब लगानी गरेको छ, जुन रकम १० वटा वाणिज्य बैंकहरुको भन्दा धेरै हो ।

दोस्रो नम्बरमा रहेको गरिमा विकास बैंकले १७ अर्ब पाँच करोड रुपैयाँ कर्जा लगानी गरेको देखिन्छ, जुन ७ वटा वाणिज्य बैंकहरुको भन्दा धेरै हो ।

यस्तै, लुम्बिनी विकास बैंकले ११ अर्ब ५२ करोड, सांग्रिला डेभलपमेन्ट बैंकले ९ अर्ब ९० करोड, महालक्ष्मीले सात अर्ब ५१ करोड रुपैयाँ घरजग्गा कर्जा प्रवाह गरेको देखिन्छ । सबैभन्दा कम घरजग्गा कर्जा प्रवाह गर्ने विकास बैंकमा सालपा देखिन्छ, जसले एक रुपैयाँ पनि कर्जा लगानी गरेको छैन । नारायणी, कर्पोरेट, कर्णाली, सप्तकोशी, सिन्धु, मितेरी, ग्रिन लगायतका विकास बैंकको पनि घरजग्गामा कम लगानी रहेको देखिन्छ ।

फाइनान्समा मञ्जुश्री अगाडि

घरजग्गा क्षेत्रमा कर्जा लगानी गर्ने फाइनान्स कम्पनीहरुमध्ये सबैभन्दा अगाडि मञ्जुश्री फाइनान्स देखिएको छ । मञ्जुश्रीले हालसम्म घरजग्गामा पाँच अर्ब १९ करोड लगानी गरेको छ ।

यस्तै, आइसीएफसीले तीन अर्ब ६ करोड, एनएसएमएलले एक अर्ब ७८ करोड, गुहेश्वरीले एक अर्ब ७८ करोड, पोखराले एक अर्ब ६८ करोड, श्रीले एक अर्ब ६२ करोड, गोर्खाले एक अर्ब ३८ करोड लगानी गरेका छन् । घरजग्गामा सबैभन्दा कम कर्जा लगानी गर्ने फाइनान्सहरुमा मल्टीप्रपस, जानकी, समृद्धि, क्यापिटल, एनएफएल, प्रोग्रेसिभ, सेन्ट्रल रहेका छन् । यी फाइन्नान्स कम्पनीको घरजग्गा क्षेत्रमा एक अर्बभन्दा कम लगानी रहेको देखिन्छ ।