साउनमा घरजग्गा क्षेत्रमा कर्जा प्रवाह सुस्त

काठमाडौं । आर्थिक वर्षको पहिलो महिना साउनमा बैंक तथा वित्तीय संस्थाहरुले घरजग्गा क्षेत्रमा कर्जा प्रवाह बढाउन सकेनन् । अर्थतन्त्रमा देखिएको अनिश्चितताका कारण उपभोक्ताहरु ‘पर्ख र हेर’को अवस्थामा रहेको हुँदा कर्जा प्रवाह बढ्न नसकेको हो ।

नेपाल राष्ट्र बैंकले बिहीबार सार्वजनिक गरेको वित्तीय विवरणअनुसार साउन महिनामा व्यक्तिगत आवासीय घरकर्जा ६९ करोड रुपैयाँ थपिएको छ भने रियल इस्टेट कर्जा १२ अर्ब मात्र थपिएको छ । अघिल्लो आवको साउनको तुलनामा समिक्षा महिनामा प्रवाह भएको व्यक्तिगत आवासीय घरकर्जा अत्यन्तै कम हो ।

अघिल्लो साउनमा व्यक्तिगत आवासीय घरकर्जा ११ अर्ब २४ करोड रुपैयाँ थपिएको छ । रियल इस्टेट कर्जा भने अघिल्लो साउनमा ९ अर्ब ३२ करोड ऋणात्मक रहेकोमा यस वर्ष १२ करोड धनात्मक देखिएको छ ।

आव ०८१/८२ को साउनसम्ममा व्यक्तिगत आवासीय घरकर्जा ३ खर्ब ८७ अर्ब ७१ करोड रुपैयाँ पुगेको छ । जुन अघिल्लो महिना असारको तुलनामा ०.२ प्रतिशतले वृद्धि भएको हो ।

तर, रियल इस्टेट कर्जामा भने खासै परिवर्तन भएको देखिँदैन । साउन महिनामा रियल इस्टेट कर्जा २ खर्ब ६८ अर्ब २५ करोड रुपैयाँ पुगेको छ, जुन अघिल्लो महिना असारको तुलनामा १२ करोड १५ लाख रुपैयाँले मात्र वृद्धि हो । 

बैंकबाट कर्जा लिएर आफ्नो आवासीय आवश्यकता पूरा गर्ने बढेपछि व्यक्तिगत घरकर्जा वृद्धि भएको देखिएको छ । तर, रियल इस्टेट क्षेत्रको स्थिरताले यस क्षेत्रमा जोखिम कम गर्न र संयम अपनाउने रणनीति लिएको देखिन्छ । 

बैंक तथा वित्तीय संस्थाहरूले आगामी दिनमा घरजग्गा क्षेत्रमा ऋण प्रवाहमा के कस्तो नीति अपनाउने छन् भन्ने विषयले कर्जाको विस्तारलाई देखाउनेछ ।