चितवनमा दुई अर्बमा ७० घरको व्यवस्थित कोलोनी बन्दै, सुरुवाती मूल्य सवा दुई करोड

काठमाडौं । चितवनको भरतपुरमा ५२ कट्ठा क्षेत्रफलमा सुविधा सम्पन्‍न हाउजिङ परियोजना निर्माण हुने भएको छ । सिद्धी हाउजिङ प्रालिले ७० घरसहितको व्यवस्थित कोलोनी ‘सुख भिल्लाज’ निर्माण गर्न लागेको हो ।

भरतपुर–९ मा निर्माण हुने परियोजनामा मित्तल र क्वेष्ट समूहको दुई अर्ब रुपैयाँ लगानी रहने बताइएको छ । पूर्व–पश्चिम राजमार्गदेखि करिब तीन सय मिटरभित्र हाउजिङ परियोजना निर्माण गर्न लागिएको हो । सो स्थान भरतपुरस्थित केन्द्रीय बस टर्मिनल चोकदेखि ८ सय मिटर र बसन्त चोमबाट करिव ३ सय मिटर दुरीमा रहेको सौरभ तिमिल्सिनाले बताए । 

छिट्टै निर्माण कार्य सुरु गरि ३० महिनाभित्र परियोजना सम्पन्‍न गर्ने तयारी छ । पहिलो चरणमा ६ महिनाभित्र ८–१० वटा घर निर्माण गरिसक्ने उनको भनाई छ । परियोजनामा बन्‍ने घरहरुको बुकिङ खुल्ला भइसकेको छ । 

८ देखि १२ धुर क्षेत्रफलमा बन्ने घरहरु २३२५ देखि २६९५ वर्गफिटका साढे २ तल्लाका हुनेछन् । यी घरहरुमा चार र पाँच बेडरुम हुने बताइएको छ ।

साढे दुई तला घरको सुरुवाती मूल्य (प्रि–बुकिङ छुटसहित) दुई करोड २५ लाख रुपैयाँ रहेको छ । यो छुट सुविधा केही समयका लागि रहने बताइएको छ । छुटबेगर घरको सुरुवाती मूल्य २ करोड ६५ लाख रुपैयाँ तोकिएको छ । प्रि–बुकिङ छुट योजनाअन्तर्गत ४० लाख रुपैयाँ छुट दिइरहेको तिम्सिनाको भनाई छ ।

सिद्धी हाउजिङले प्लानिङ पर्मिट लिएरै हाउजिङ परियोजना निर्माण गर्न लागेको हो, जुन चितवनकै पहिलो अनुमतिप्राप्त हाउजिङ परियोजना हुनेछ । अहिलेसम्म प्लानिङ पर्मिट लिएर जग्गा प्लटिङ (घडेरी)को काम भए पनि व्यवस्थित हाउजिङ परियोजना निर्माण भएका छैनन् । 

कूल जग्गाको २५ प्रतिशत सडक, ५ प्रतिशतभन्दा बढी खुल्ला स्थान र करिब ३ प्रतिशत सामाजिक क्षेत्रका लागि रहने बताइएको छ । हाउजिङ परियोजनाभित्र स्वीमिङ पुल, जिम हल, मन्दिर, कन्फ्रेसन हललगायत रहने छन् ।

घरको छतमा पनि प्लन्ज पुल बनाइने भएको छ । चितवनकै ग्राहकहरुलाई लक्षित गरेर आफुहरुले हाउजिङ परियोजना ल्याएको उनको भनाई छ । चितवन देशकै फास्ट ग्रोइङ इमर्जिङ सिटी हो । यसैले मन्दीकै अवस्थामा पनि व्यवस्थित हाउजिङ परियोजना निर्माण गर्न कस्सिएको उनले बताए । 

केही वर्षयता भरतपुरमा पूर्वाधार विकासको काम द्रूत गतिमा भइरहेको छ । शहरको विकाससँगै आधुनिक लक्जरी आवासको सुविधा दिने सिद्धी हाउजिङको उद्देश्य रहेको छ । 

सुख भिल्लाजले वीरगञ्‍जमा १०४ वटा घर बनाइरहेको छ । काठमाडौंको सानो भर्याङमा पनि अपार्टमेन्ट निर्माण सुरू गर्न लागेको छ, त्यहाँ ६०–७० वटा घर बनाउने तयारी छ । बाफल परियोजनाका सबै घरहरू बिक्री भइसकेका छन् ।

सुख भिल्लाज चितवनमा डिजाइन, सुविधा र मूल्यका हिसाबले अलग्यै श्रेणीका घरहरु बनाउन लागेको कम्पनीको दाबी छ । अहिले चितवन परियोजनाको जग्गा सम्याउने काम भइरहेको छ ।