मध्यम वर्गलाई लक्षित गरी ‘लो कष्ट’ आवास परियोजना निर्माण गर्न सरकारलाई सुझाव

काठमाडौं । सहरी विकास मन्त्रालयले गठन गरेको जग्गा तथा आवास समस्या सुधार सुझाव कार्यदलले निजी क्षेत्रसँग मिलेर निम्न तथा मध्यमवर्गलाई लक्षित गरी ‘लो कष्ट’ हाउजिङ तथा अपार्टमेन्ट परियोजनाहरु निर्माण गर्नुपर्ने सुझाव दिएको छ ।

मन्त्रालयका सहसचिव दिलीप भण्डारी संयोजकत्वको कार्यदलले सहरी विकास मन्त्री प्रकाशमान सिंहलाई प्रतिबेदन बुझाउँदै लो कष्ट परियोजनामा निजी क्षेत्रसँगै स्थानीय तहलाई पनि सहभागी गराउन सुझाव दिएको छ । निजी क्षेत्र र स्थानीय तहलाई अधिकार प्रत्यायोजनसहित संलग्न नगराएमा यस्ता परियोजनाले मुर्ततता नपाउने प्रतिवेदनमा उल्लेख छ ।

कार्यदलले व्यक्तिगत रूपमा हुने घरजग्गा किनबेच रोकेर कम्पनीमार्फत मात्रै कारोबार गर्न सरकारलाई सुझाव दिएको छ । घरजग्गा कारोबारमा हुने बिचौलिया रोक्न र करछली नियन्त्रणका लागि दर्तावाल एजेन्ट वा एजेन्सीमार्फत मात्र जग्गा कारोबार गर्ने व्यवस्था गरिनुपर्ने रायसुझाव छ ।

कम्पनी वा एजेन्टबाट मात्रै घरजग्गाको कारोबार हुँदा राजस्व छली रोकिइ सरकारले पाउने कर पनि बढ्ने अपेक्षा छ ।

जग्गाको हदबन्दीका कारण देशमा ठूलो स्केलका हाउजिङ तथा अपार्टमेन्ट पयिोजना निर्माण हुन नसकेको औंल्याउँदै कार्यदलले हदबन्दी खुकुलो बनाउन अन्तरमन्त्रालय समन्वय गर्न पनि सुझाव दिएको छ ।

सानो स्केलका हाउजिङ र अपार्टमेन्ट निर्माण हुनुमा जग्गाको हदबन्दी पनि प्रमुख कारण रहेको अध्ययनमा देखिएको छ । सरकारले सहज नीति निर्माण गरिदिएर निजी क्षेत्रलाई अगाडि बढाएको खण्डमा घरजग्गा व्यवसाय मात्र होइन, समग्र अर्थतन्त्र नै चलायमान हुने व्यवसायीको विश्वास छ । 

सहरी विकास मन्त्रालयले २३ असोजमा ७ सदस्यीय कार्यदल गठन गरेको थियो । जसले २७ बुँदामा तीन महले सुझाव दिएको छ ।