गाउँले भन्दा सहरीया बासिन्दा बढी, सहरको जनसंख्या ६२.२ प्रतिशत

काठमाडौं । नेपालको गाउँमा भन्दा सहरमा बस्ने जनसंख्या धेरै भएको छ । मुलुकको कुल जनसंख्यामध्ये सहरी क्षेत्रमा बसोबास गर्नेको संख्या ६२.२ प्रतिशत पुगेको छ । अर्थमन्त्री डा. युवराज खतिवडाले सार्वजनिक गरेको आर्थिक सर्भेक्षणमा पुस मसान्तसम्म गाउँमा बसोबास गर्ने जनसंख्या ३७.८ प्रतिशत मात्र देखिन्छ । 

पछिल्लो समय विकास भएको तीब्र सहरीकरण र गाउँपालिकाहरु जोडेर नयाँ नगरपालिकाहरुको घोषणा गरिएका कारण सहरी बासिन्दा ह्वात्तै बढेको आर्थिक सर्भेक्षणमा भनिएको छ । 

नेपालमा ६ महानगरपालिका, ११ उपमहानगरपालिका, २७६ नगरपालिका र ४६० गाउँपालिका गरी ७५३ स्तानीय तह रहेका छन् । अधिकांश नगरपालिका गाउँका पाखा पखेरा पनि समेटेर घोषणा गरिएको छ । गाउँका पाखा पखेराहरु पनि नगरपालिकाभित्र परेपछि त्यहाँका बासिन्दा पनि सहरी बासिन्दामा समेटिएका छन् । नगरपालिकाको संख्या बढेकै कारण सहरी बासिन्दा बढेको सरकारको भनाई छ । 

नेपालका अधिकांश नगरपालीकाले तोकिएको स्टान्डर्ड मेन्टेन गर्न सक्दैनन् । राजनीतिक दबाबको आधारमा गाउँलाई पनि समेटेर धेरै नगरपालिका घोषणा गरिएको छ । हुन त नेपालका महानगरपालिका, उपमहानगरपालिकाले पनि महानगरमा हुनुपर्ने न्यूनतम शर्तहरु पुरा गर्न सक्दैनन् ।