कार्पेटको सट्टामा भिनायल राम्रो कि पार्केटिङ ? यस्तो छ मूल्य अन्तर

घरको भुइँमा कार्पेट बिछ्याउने चलन पुरानो भइसकेको छ । अहिले घरको भुइँमा काठको पार्केटिङ, लेमिनेटेड पार्केटिङ वा सिन्थेटिक भिनायल लगाएर सजाउन थालिएको छ । 

बजारमा सुलभ मूल्यमै थरिथरीका रेडिमेट पार्केट किन्न पाइन्छ । यदि महंगो मूल्य तिर्न तयार भए काठबाट बनेका पार्केट किनेर फ्लोरिङ गर्न सकिन्छ ।

उपभोक्ताले आफ्नो आर्थिक अवस्था अनुसार फ्लोरिङ गर्न सकिने फ्लोरिङको काम गर्ने यति पोलिकेम कम्पनीका सन्तोष श्रेष्ठ बताउँछन् ।

घरमा कार्पेट बिछ्याउनु स्वास्थ्यका लागि पनि त्यति फाइदाजनक मानिदैन । कार्पेटभित्र धुलो जम्मा हुने भएकोले एलर्जी हुने समस्या आउन सक्छ । कोठामा पानी, चिया, केटाकेटीको पिसाव जमेर रहने हुँदा पनि कार्पेट अस्वस्थकर हुन्छ । 

तर, काठको पार्केट वा भिनायलको फ्लोरिङ गर्दा त्यस्तो समस्या आउँदैन् ।

समयको गतिसँगै घरको सुन्दरताको परिभाषा पनि फेरिँदै गइरहेको छ । अचेल घर सुन्दर बनाउनका लागि भित्ता र सिलिङमा राम्रो कलर गरेर मात्र पुग्दैन, घरको भुइँ पनि चिटिक्क पार्नुपर्ने हुन्छ । हामीले भुइँलाई विभिन्न तरिकाले सजाउन सकिन्छ जसमा भिनायल, लेमिनेटेड पार्केटिङ र काठको पार्केटिङ मुख्य हुन आउँछन् । 

तुलनात्मक रुपमा भिनायल सस्तो पर्छ र काठको पार्केटङ महंगो । बजारमा चीन, कोरिया लगायत मुलुकबाट रेडिमेट लेमिनेटेड पार्केटिङ पनि आउँछन् । रेडिमेट खोलभित्र भुस खाँदेर बनाइएको पार्केट हेर्दा काठजस्तै देखिन्छ । रेडिमेट लेमिनेटेड पार्केट पनि काठको पार्केटभन्दा धेरै सस्तो पर्न आउँछ । 

हामीले तपाईंलाई भिनायल र पार्केटिङको फाइदा र बेफाइदासँगै बजार मूल्यका बारेमा जानकारी गराउँदै छौं । 
 
भिनायल र पार्केट फ्लोरिङ

पार्केट फ्लोरिङ काठका टुक्राहरु जोडेर बनाइन्छ । यसले कोठालाई थप विलासी र आकर्षक बनाउँछ । कोठा पनि प्राकृतिक पनि देखिन्छ । भिनायल फ्लोरिङ पिभिसी सिन्थेटिक सामाग्रीबाट बनेको हुन्छ जुन लचिलो र बलियो हुन्छ । यही गुणले भार राम्रोसँग थेग्न पनि सक्छ । व्यवसायीका अनुसार भिनायलको तुलनामा पार्केट फ्लोरिङ कम बलियो हुन्छ । 

भिनायल र पार्केटिङको मूल्य अन्तर

सिन्थेटिक प्रविधिको भिनायलको तुलनामा काठको पार्केट फ्लोरिङ महंगो हुन्छ । विदेशी रेडिमेट (भुस खाँदेर बनाइएको) पार्केटिङ बिक्री गर्दै आइरहेको होम डेकर कम्पनीका अनुसार रेडिमेट लेमिनेटेड पार्केटिङको मूल्य प्रतिबर्गफिट ८ एमएमको क्वालिटीअनुसार ११० रुपैयाँ, १३० रुपैयाँ, १४० रुपैयाँ, १५० रुपैयाँसम्म पर्छ । यस्तै, १२ एमएमको प्रतिबर्गफिट २२० रुपैयाँ र १२ एमएम हाई क्वालिटीको २७० रुपैयाँ पर्ने होम डेकर कम्पनीले बतायो ।
 
नेपालकै काठबाट बनाइएको पार्केटिङ बिक्रेता कम्पनी मोडर्न पार्केट एन्ड डेकोरेटर्सका अनुसार सिसौको काठबाट बनाइएको फ्लोरिङ बढी बलियो हुन्छ । अहिले बजारमा सिसौको गुणस्तर अनुसार प्रतिबर्गफिट ८ एमएमको २ सय रुपैयाँ, ३ सय रुपैयाँ र ३५० रुपैयाँसम्म पर्छ । यस्तै, १० एमएम मोटाईको पार्केटिङ लगाउँदा प्रतिबर्गफिट २५० रुपैयाँ, ४५० रुपैयाँ र ५५० रुपैयाँ पर्छ । १२ एमएमको स्पेशल पार्केटिङ लगाउँदा ५५० रुपैयाँ प्रतिबर्गफिट पर्ने कम्पनीले जनायो । 

सामन्यतया बजारमा काठको पार्केट मोटाई, गुणस्तर र काठको प्रकृति अनुसार प्रतिबर्गफिट २ सय रुपैयाँदेखि १ हजार रुपैयाँसम्म पर्ने व्यवसायी बताउँछन् ।

यति पोलिकेम प्रालिका अनुसार सिन्थेटिक भिनायलको फ्लोरिङ गर्दा ३ एमएमको १२४ रुपैयाँ प्रतिबर्गफिट र २ एमएमको १०७ रुपैयाँ प्रतिबर्गफिट लागत पर्न आउँछ । भिनायल र लेमिनेटेड (भुष खाँदेको) पार्केटबाट फ्लोरिङ लगाउँदा करीव उस्तै उस्तै लागत पर्न आउने व्यवसायी बताउँछन् ।

रेडिमेट लेमिनेटेड पार्केटिङको मूल्य गुणस्तर अनुसार फरक फरक पर्छ  । यति पोलिकेमका सन्तोष श्रेष्ठका अनुसार सस्तो र आकर्षक पनि देखिने हुनाले धेरैले लेमिनेटेड आर्टिफिसियल पार्केटिङ लगाउने गरेका छन् । लेमिनेटेड पार्केटिङ झट्ट हेर्दा काठजस्तै देखिन्छ ।

भिनायलको विशेषता 

भिनायल फ्लोरिङको प्रतिरोधी गुण बढी हुन्छ । व्यवसायीका अनुसार भिनायल २० वर्षसम्म टिकाउ हुन्छ । यसमा च्यातिने र कोतारिने समस्या रहँदैन । आगलागीको जोखिम पनि रहँदैन । भुइमा धेरै तौलका भारी सामान राख्दा फ्लोरिङ बिग्रिएला कि भनेर डराउनु पनि पर्दैन । 

भिनायल फ्लोरको आद्र्रता पनि पार्केटिङ फ्लोरको भन्दा राम्रो हुन्छ । पानी र ओसको निरन्तर सम्पर्कमा आउँदा पनि क्षति हुँदैन । 

भिनायल फ्लोरको मर्मत तथा सुरक्षा गर्न सजिलो छ । भिजेको कपडा र साबुन पानीले सफाइ गर्न सकिन्छ । भिनायलको फ्लोरिङ गर्न पनि सजिलो हुन्छ । यो रोलमा आउने हुनाले लगाउन सजिलो हुने भएको हो । भिनायल विभिन्न रङमा किन्न पाइन्छ ।

पार्केट फ्लोरिङका विशेषता 

यो साँच्चिकै काठबाट बनेको हुनाले आकर्षक देखिन्छ । यो बलियो पनि हुन्छ । तर, यसको भारबहन क्षमता भिनायलको भन्दा कम हुन्छ । पार्केटिङ वस्तु यता उता सार्दा कोतरिने डर पनि उत्तिकै रहन्छ । 

ओसिलो तथा चिसो ठाउँमा काठको पार्केटिङ टिकाउ हुँदैन । तर, भिनायल चिसोले पनि खासै फरक पर्दैन । यति पोलिकेम कम्पनीका अनुसार पर्केटिङ फ्लोरिङ गरेपछि धेरै कुराको सावधानी अपनाएर स्याहार गर्नुपर्ने हुन्छ । पार्केटमा लागेका मैलो र दाग सफा गर्ने क्रममा ध्यान पु¥याउनु पर्छ किनभने साबुन पानी र भिजेको कपडाले पुछ्दा वा सफा गर्दा ओस पर्ने र भिज्ने भएकोले काठ मक्किने र गलेर कमजोर हुने खतरा रहन्छ । 

काठको पार्केटिङले घरलाई प्राकृतिक र कलात्मक बनाउँछ । अन्य किसिमको फ्लोरिङ भन्दा पार्केटिङ हेर्दाखेरि पनि आकर्षक र लोभलाग्दो देखिन्छ । काठको फ्लोरिङ गर्दा जाडो मौसममा तापक्रम पनि मेन्टेन हुन्छ ।

तर, काठजस्तै देखिने लेमिनेटेड पार्केट काठको पार्केटिङजस्तो हुँदैन । लेमिनेटेड पार्केटिङको चमक पनि त्यति हुँदैन । तर, यो कोतरिने सम्भवना भने कम रहन्छ । लेमिनेटेड पार्केटिङ काठको पार्केटिङको तुलनामा पनि सस्तो पर्छ । यो पार्केटिङ लगाउँदा प्राकृति महशुस नहुन सक्छ । यो देख्दा काठजस्तै देखिए पनि जाडोमा चिसो हुन्छ ।

सस्तोमै पार्केटिङ गर्न सकिने हुँदा घर तथा अफिसहरुमा काठको पार्केटिङ भन्दा आयातित लेमिनेटेड पार्केटिङ बढी प्रयोग भइरहेको व्यवसायी बताउँछन् ।