काठमाडौंमा सस्तो डेरा चाहियो ? यी हुन् सस्तोमा डेरा पाइने १० स्थान !

संघीय राजधानी काठमाडौं शहर पूर्व मेचीदेखि पश्‍चिम महाकालीसम्म सबैको पहिलो रोजाईको गन्तव्य हो । अध्ययनका लागि होस् वा रोजगारी गर्न, व्यापार व्यवसाय गर्न होस् वा विलासी जिवन जिउन । सबैको पहिलो रोजाईमा पर्छ काठमाडौं ।

मुलुक संघीय प्रणालीमा गइसकेपछि काठमाडौंको चाप विस्तारै घट्ने अनुमानका विपरित बर्षेनी काठमाडौंमा भिडभाड बढ्दै गइरहेको छ । अब काठमाडौंमा घर बनाउनका लागि खाली जग्गा पाउन पनि मुस्किल हुन थालिसकेको छ । काठमाडौं बाहिरबाट आउनेहरु डेरा भाडामा बस्‍ने भएपछि यहाँका घरधनीको मुख्य पेशा नै घरभाडा हुन थालेको छ । 

अहिले काठमाडौंका घरधनीले जति चाहन्छन् त्यति नै हुने गरेको छ घरभाडा । त्यसैले कोर सिटीमा एउटै कोठाको १०-१२ हजार रुपैयाँसम्म घरभाडा तिर्नुपर्छ । फ्ल्याट लिनुपरे कम्तिमा २५ हजार खर्चिनु पर्छ । आफुले दुःख गरेर कमाएमो पैसा सबै घरभाडामै सिध्यिने भएपछि खाने के गरी ? अब त सामान्य आम्दानी हुनेहरु रिङरोडभित्र फ्ल्याट वा कोठा लिएर बस्‍न नसक्ने अवस्था भइसकेको छ ।

के तपाईंलाई थाहा छ, रिङरोडबाट केही किलोमिटर बाहिर निस्कने हो भने अझै पनि सस्तोमै घरभाडामा पाउन सकिन्छ । अहिले रिङरोड बाहिर पनि धेरै घरहरु बनिरहेका छन् जहाँ छानी छानी घर खोजेर भाडामा बस्‍न पाइन्छ । रिङरोडभित्र पुराना घरमा बस्‍नुको सट्टा रिङरोड बाहिर नयाँ घरमै सस्तो मूल्यमा बस्‍न पाइन्छ भने किन खुम्चिएर बस्‍ने त !

अहिले रिङरोड बाहिर पनि हरेक ठाउँमा सार्वजनिक यातायातको राम्रो व्यवस्था छ । त्यसमाथि पछिल्लो समय आफ्नै एउटा मोटरसाइकला, स्कुटर वा गाडी नहुने व्यक्ति कमै हुनुहुन्छ होला । केही मिनेटको यात्रामा सस्तो मूल्यमा नयाँ घरमा कोठा भाडा पाउन सक्ने सम्भावना छ ।

आज हामी रिङरोड बाहिरका सस्ता ठाउँहरु जहाँबाट मुख्य शहरमा सजिलै आउन सकिन्छ, ती ठाउँहरुको हामी जानकारी गराउँदै छौं ।

कपन 

कपन तथा बुढानिलकण्ठ क्षेत्रमा ४ कोठाको फ्ल्याटमा मासिक १० हजारदेखि १५ हजार रुपैयाँसम्म तिरेर बस्‍न सकिन्छ । भित्री टोलमा रहेका घरको कोठाहरु ४ हजारदेखि ५ हजारसम्म र मुख्य सडकमा रहेका घरका कोठाहरु ६ हजारमै बस्‍न पाइने स्थानीय बताउँछन् ।

रिङरोडबाट २ देखि ३ किलोमिटर दुरीमै सस्तोमा कोठा पाइने मात्र होइन, बच्चाबच्चीका लागि पठनपाठन र स्वास्थ्योपचारका लागि राम्रा हस्पिटल पनि यही क्षेत्रमा छन् । यो क्षेत्रबाट काठमाडौं शहरमा आउनका लागि सार्वजनिक यातायातको राम्रो प्रबन्ध पनि छ ।

माकलवारी-जोरपाटी 

गोकर्णेश्‍वर माकलवारीमा ४ कोठाको फ्ल्याट १२ देखि १६ हजारसम्म पाउन सकिन्छ । एउटा कोठा लिएर बस्‍ने हो भने ठाउँ हेरिकन ४ देखि ८ हजारसम्म कोठा पाउन सकिने स्थानीय बताउँछन् । यो ठाउँमा पनि सार्वजनिक यातायातको राम्रो प्रबन्ध छ । स्कुल, बजार तथा अस्पतालको सेवा पनि राम्रो रहेको छ। नजिकै नेपाल मेडिकल कलेज , अपाङ्ग अस्पताल , शंकरापुर अस्पताल रहेकाले पनि यो ठाउँमा हाल आकर्षण बढेको छ। 

कालिमाटी

कालिमाटीका भित्री क्षेत्रहरुमा पनि फ्ल्याट १२ देखि १८ हजार र कोठाहरु ४ देखि ७ हजारसम्म पाइन्छन् । कालिमाटी रिङरोड भित्रै पर्ने भएकोले शहरको जुनसुकै भागमा सजिलै पुग्‍न सकिन्छ । तर, कालिमाटीको भित्री भागमा रहेका घरमा पुग्‍न निकै साँघुरो बाटाहरु रहेका छन् । यस क्षेत्रमा पार्किङको भने समस्या छ ।

धापासी

पछिल्लो समय बसोबासका लागि सर्वाधिक रोजाइमा पर्ने ठाउँमध्ये धापासी पनि पर्छ । रिङरोडबाट केही किलोमिटर दुरीमा रहेको धापासीमा १२ देखि १८ हजारसम्म ४ कोठे फ्ल्याट र ५ देखि ८ हजारसम्म कोठाहरु पाउन सकिन्छ । यस क्षेत्रमा शिक्षा र स्वास्थ्यको राम्रो प्रबन्ध छ । सार्वजनिक यातायात सजिलै पाउने हुँदा आवात जावत गर्न पनि सजिलो रहेको स्थानीय बताउँछन् ।

टोखा

टोखा पनि पछिल्लो समय सर्वाधिक रोजाइको ठाउँ बनेको छ । टोखामा १० देखि १५ हजारसम्म ४ कोठे फ्ल्याट र ३ देखि ६ हजारसम्म कोठाहरु पाउँछ । सार्वजनिक यातायातका लागि कुनै चिन्ता लिनु पर्दैन । यो क्षेत्रमा खानेपानीको पनि राम्रो प्रबन्ध छ । नजिकै ग्रान्डी हस्पिटल छ । 

लुभु

ललितपुरको लुभुमा पनि आकर्षण बढ्दो छ । लुभुमा धमाधम नयाँ आवासिय घरहरु बनिरहेका छन जुन घरमा सस्तोमै डेरा पाइन्छन् । त्यहाँ ४ कोठे फ्ल्याट १० देखि १५ हजारसम्म र कोठाहरु ३ देखि ६ हजारसम्म रोजीरोजी पाइन्छन् । त्यहाँ पनि सार्वजनिक यातायातको राम्रो सुविधा छ । शिक्षाका लागि राम्रा राम्रा स्कुलहरु खुलिरहेका छन् । 

हरिसिद्धी देखि गोदावरीसम्म 

ललितपुरकै हरिसिद्धी, सानागाउँ, गोदामचौर, बिष्‍ट गाउँमा पनि सस्तोमै कोठा पाउन सकिन्छ । रिङरोडबाट २-३ किलोमिटर दुरीमा रहेको हरिसिद्धी र सानागाउँमा ८ देखि १२ हजारसम्म ४ कोठे फ्ल्याट पाउन सकिन्छ । कोठाहरु ४-५ हजारमै पाइन्छन् । सम्म परेको फाँटमा अहिले धमाधम नयाँ घरहरु बनिरहेका छन् । यस्तै, गोदामचौरमा ८-१० हजारमै रोजेको फ्ल्याट पाउँछ ।

ललितपुरको गोदावरीमा पनि १० देखि १५ हजारसम्म राम्रै फ्ल्याट पाउन सकिन्छ । सार्वजनिक यातायातको राम्रो प्रबन्ध भएको गोदावरीमा बस्नका लागि पनि शान्त र रमणिय ठाउँ हो । खाने पानीको कुनै दुःख छैन । पछिल्लो समय गोदावरी आवासका लागि सर्वाधिक रोजाइमा पर्न थालेको छ । शहरमा आउनका लागि पनि केही मिनेटको यात्रा गरे पुग्छ ।

मुलपानी

काठमाडौंको मुलपानीमा ४ कोठे फ्ल्याट १० देखि १२ हजारसम्म पाउँछ । कोठाहरु ३ हजारमै पाइन्छन् । थानकोट क्षेत्र बसोबासका लागि हटस्पट बनेको छ । चौडा सडक र सार्वजनिक यातायातको राम्रो प्रबन्ध भएको हुँदा थानकोट क्षेत्र सर्वाधिक रोजाइमा पर्न थालेको हो । थानकोट क्षेत्रमा ८ देखि १५ हजारसम्म रोजी रोजी फ्ल्याट लिएर बस्‍न पाइन्छ । त्यहाँ ४-५ हजारमै कोठा भाडामा पाइन्छन् । नेपालटार र फुटुङ क्षेत्रमा पनि १० देखि १५ हजारसम्म फ्ल्याट पाउँछ । बालाजुबाट २ किलोमिटर दुरीमा रहेको नेपालटार शहरबाट निकै नजिक पर्छ । 

भक्तपुर र कीर्तिपुर 

किर्तिपुरमा पनि १०-१५ हजारमा राम्रा फ्ल्याट पाइन्छन् । भक्तपुरको दुवाकोट, दधिकोट, सिरुटार, बालकोट, सानो ठिमी, सल्लाघारी लगायत धेरै ठाउँहरुमा अहिले पनि ८ देखि १५ हजारसम्म छानी छानी ४ कोठे फ्ल्याट लिएर बस्‍न पाइन्छ । अहिले भक्तपुरका सबै ठाउँमा सार्वजनिक यातायात पुगिसकेको छ । पछिल्लो समय आवासका लागि भक्तपुरका क्षेत्रहरु रोजाइमा परिरहेका छन् ।