२० प्रतिशत अपार्टमेन्ट विदेशीलाई बिक्री गर्न बाटो खुल्यो !

काठमाण्डौ । सरकारले नेपालमा निर्माण भएका २० प्रतिशत अपार्टमेन्ट विदेशीलाई बिक्री गर्न दिने भएको छ ।

अर्थमन्त्री जनार्दन शर्माले आगामी बर्षको बजेट प्रस्तुत गर्दै एकसय युनिटसम्मको अपार्टमेन्टमा बढीमा २० प्रतिशत् अर्थात् २० युनिट अपार्टमेन्ट विदेशी नागरिकलाई विदेशी मुद्रामा बिक्री गर्न दिने घोषणा गरेका छन् ।

मुलुकमा बिदेशी मुद्राको सञ्‍चिती कम भइरहेका बेला डलर आम्दानी बढाउने उदेश्यले यो ब्यबस्था गरिएको हो । बिदेशीलाई बिक्रि गरिने अपार्टमेन्ट खरिदका लागि नेपालका बैंक तथा बित्तिय संस्थाबाट ऋण लिन नपाइने र पूर्णतया नगदमा किन्‍नुपर्ने भएकाले मुलुकको डलर आम्दानी बढ्ने सरकारको बिश्वास छ ।

‘यसले नेपालको इज्जत पनि बढाउँछ, बिदेशी मुद्राको आर्जन पनि बढाउँछ’ एक रियलस्टेट ब्यबसायीले भने– हामीले ५० प्रतिशत नै बिदेशीलाई बिक्रि गर्न दिनुपर्ने माग गरेका थियौं, तर २० प्रतिशत नै भए पनि निकै राम्रो सुरुवात हो ।’

यसरी बिदेशीलाई बिक्रि गरिएको अपार्टमेन्टका स्वामित्व ९९ बर्षका लागि मात्र हुने गरी कानुनी प्रबन्ध गर्न लागिएको अर्थमन्त्रालय स्रोतले जानकारी दिएको छ । ९९ बर्षपछि बिक्रि गरिएका अपार्टमेन्ट स्वतः सरकारका नाममा हुनेछन् । विदेशीलाई अपार्टमेन्ट बिक्री गर्दा विदेशी मुद्रा भित्रिनुका साथै पर्यटन क्षेत्रलाई पनि सहयोग पुग्‍ने विश्वास छ ।

नेपाल जग्गा तथा आवास विकास संघले पनि सरकारलाई विदेशी नागरिकलाई अपार्टमेन्ट बिक्रीका लागि खुला गर्न सुझाव दिएको थियो । निजी क्षेत्रका अग्रणी संस्थाहरु नेपाल उद्योग वाणिज्य महासंघ र नेपाल उद्योग परिसंघले पनि अपार्टमेन्ट बिदेशीलाई बिक्री गर्न दिनुपर्ने सुझाव दिएका थिए ।

Photo: OnlineKhabar