नेपाल राष्ट्र बैंक (एनआरबी)ले सोमबार सार्वजनिक गरेको ‘देशको वर्तमान आर्थिक तथा वित्तीय स्थिती’ले ६ महिनामा घरजग्गा कर्जा ८७ प्रतिशतले घटेको देखाएको हो ।
काठमाडौं । सुस्ताएको घरजग्गा कारोबारले क्रमशः लय समात्न थाले पनि बैंक तथा वित्तीय संस्थाहरुले घरजग्गामा प्रवाह गर्ने कर्जा भने बढ्न सकेको छैन् ।
नेपाल राष्ट्र बैंक (एनआरबी)ले सोमबार सार्वजनिक गरेको ‘देशको वर्तमान आर्थिक तथा वित्तीय स्थिती’ले ६ महिनामा घरजग्गा कर्जा ८७ प्रतिशतले घटेको देखाएको हो ।
चालु आर्थिक वर्षको पुुस मसान्तसम्म बैंक तथा वित्तीय संस्थाहरुबाट ८ अर्ब २ करोड रुपैयाँ कर्जा प्रवाह भएको छ । जबकी, गत वर्षको सोही अवधिमा घरजग्गामा ६१ अर्ब ८२ करोड रुपैयाँ कर्जा प्रवाह भएको राष्ट्र बैंकको तथ्यांक छ ।
चालु आर्थिक वर्षको मंसिर मसान्तको तुलनामा भने पुस मसान्तमा घरजग्गा कर्जा सामान्य बढेको देखिन्छ । साउनदेखि मंसिरसम्म पाँच महिनामा घरजग्गा क्षेत्रमा २ अर्ब ९६ करोड रुपैयाँ कर्जा पुस मसान्तमा बढेर ८ अर्ब २ करोड पुगेको छ ।
रियलस्टेट कर्जा ऋणात्मक
चालु आवको ६ महिनामा १० अर्ब ७ करोड ५९ लाख रुपैयाँ व्यक्तिगत आवासीय कर्जा प्रवाह भएको छ । तर, कमर्शियल रियलस्टेटतर्फ प्रवाह हुने कर्जा भने ऋणात्मक देखिएको छ ।
यस अवधिमा रियलस्टेट कर्जा २ अर्ब ७४ करोड रुपैयाँ ऋणात्मक देखिएको छ । मंसिर मसान्तमा रियलस्टेट कर्जा ५ अर्ब २९ लाख रुपैयाँ ऋणात्मक थियो ।
यसको मतलव, पछिल्लो महिना कमर्शियल रियलस्टेटमा प्रवाह हुने कर्जा करिव ठप्प जस्तै छ । कमर्शियल क्षेत्रमा प्रवाह भएको कर्जा उठ्ती धेरै छ भने नयाँ लगानी बढ्न सकेको देखिदैन ।
६ महिनाको अवधिमा बैंकले रेसिडेन्सियल रियलस्टेट (डेढ करोडसम्मको व्यक्तिगत आवासीय कर्जा बाहेक) तर्फ ६ अर्ब २४ करोड, कमर्शियल कम्पलेक्स एन्ड रेसिडेन्सियल अपार्टमेन्ट निर्माणमा ७३ करोड, आम्दानी सिर्जना गर्ने कमर्शियल कम्पलेक्समा ३ अर्ब ५३ करोड रुपैयाँ कर्जा लगानी गरेको देखिन्छ ।
तर, अन्य रियलस्टेट (जग्गा खरिद तथा प्लटिङसमेत)मा प्रवाह हुने कर्जा १३ अर्ब २४ करोड रुपैयाँ ऋणात्मक देखिएको छ । यसको अर्थ, यस क्षेत्रमा प्रवाह हुने कर्जा ठप्प छ, तर बैंकको पुरानो कर्जा असुली भने रफ्तारमा भइरहेको छ ।
पछिल्लो समय तरलता अभाव, चर्को ब्याजदर, महंगी, मागमा आएको सुस्तता लगायत कारणले समग्र अर्थतन्त्रमै मन्दी देखिएको छ ।
सबैभन्दा बढी मन्दीको मारमा घरजग्गा व्यवसाय परेको छ । बैंकले तरलता अभाव र चर्को ब्याजका कारण घरजग्गामा कर्जा लगानी गर्न सकेको देखिदैन ।