कैलालीमा खुल्दैछ पाँचतारे होटल, १५ तले होटलमा दुई अर्ब लगानी हुने

काठमाडौं । कैलालीको गोदावरी नगरपालिका–७ मा पर्ने हरैयामा पाँचतारे होटेल निर्माण सुरु भएको छ । यो होटेल सञ्‍चालनमा आउँदा सुदूरपश्चिम प्रदेशकै पहिलो पाँचतारे होटेल हुनेछ ।

आइडिया ग्रुपले निर्माण गर्न लागेको ‘आइडिया होटेल एन्ड क्यासिनो’को गत साउनमै कांग्रेस नेता डा. शशांक कोइरालाले शिलन्यास गरेका थिए । आइडिया ग्रुपमा गैरआवासीय नेपालसहित चिनियाँहरु पनि साझेदार छन् ।

आइडिया ग्रुपले दुई बिगाहा क्षेत्रफलमा होटेल निर्माण सुरु गरेको हो । होटेलमा १५० कोठा रहने बताइएको छ । होटेल सञ्‍चालनमा आउँदा दुई अर्बभन्दा बढी लगानी हुने अनुमान छ । 

होटेलको १५औँ तलामा हेलिप्याड निर्माण गरिने भएको छ । होटेलमा पूर्ण क्षमताको क्यासिनो सञ्‍चालन गरिने छ, जहाँ १५ सय जनाको क्षमता हुनेछ । सिमावर्ती भारतीय पर्यटकलाई लक्षित गरेर क्यासिनो सञ्‍चालन गर्न लागिएको हो ।

होटेलमा इन्फिनिटी स्वीमिङ पुल, स्काइ वार, स्काइ वाक, रुफटप हेलिकोप्टर ल्यान्डिङ हेलीप्याड, रेष्टुरेन्ट, क्याफे, जीम साउनालगायत सुविधा हुनेछन् । 

हङकङमा मुख्य कार्यालय रहेको आइडिया ग्रुपका मुख्य लगानीकर्ता गैरआवासीय नेपालीहरु भए पनि चिनियाँहरु पनि साझोदार छन् । ग्रुपको अध्यक्ष गोकर्ण श्रेष्ठ हुन् भने इन्टरनेशनल डाइरेक्टरमा छिङ छिङ त्से रहेका छन् । 

कैलालीमा निर्माण गर्न लागिएको पाँचतारे होटेलमा आइडिया ग्रुपसहित पोखराको सौभाग्य रियल स्टेट एन्ड कम्पनीको पनि लगानी रहनेछ ।