बजाज अटोका अध्यक्ष निरज बजाजले मुम्बईमा किने चार अर्बको ट्रिपलेक्स पेन्टहाउस

काठमाडौं । भारतको रियलस्टेट बजारमा अहिलेसम्मकै सबैभन्दा महंगो ट्रिपलेक्स पेन्टहाउस किनबेच भएको छ । 

बजाज अटोका अध्यक्ष निरज बजाजले मुम्बईको मालाबार हिलमा २५२.५ करोड भारतीय रुपैयाँमा सी–फेसिङ (समुद्रतर्फ फर्किएको) अपार्टमेन्ट किनेका हुन् । यो रकमलाई नेपाली मुद्रामा सटही गर्दा चार अर्ब चार करोड रुपैयाँ हुन्छ ।

यसअघि, वर्ष २०२३ को सुरुमै वेल्स्पन समूहका अध्यक्ष बीके गोयन्का र एभिन्यू सुपरमार्केटका राधाकृष्ण दमानीको गरी दुईवटा ठूला सम्झौताहरु रद्द भएका थिए । 

१ मे २०२१ देखि बजाज अटोको अध्यक्षका रुपमा काम गरिरहेका निरज बजाजले म्याक्रोटेक डेभलपर्सबाट लक्जरी अपार्टमेन्ट किनेका हुन् । 

अपार्टमेन्ट खरिद बिक्री सम्बन्धिसम्झौतापत्रमा १३ मार्चमा हस्ताक्षर भएको थियो, मनीकन्ट्रोलले इन्डेक्सट्याप डटकमद्धारा साझा गरेको कगजपत्रहरु उदृत गर्दै बतायो ।

रिपोर्टका अनुसार ट्रिपलेक्स अपार्टमेन्टको कुल क्षेत्रफल १८,००० वर्गफिट (कार्पेट एरिया १२,६२४ वर्गफिट) छ । र, यस अपार्टमेन्टका लागि आठवटा कार पार्किङ्ग गर्न मिल्ने स्लटहरु पनि राखिएको छ ।

निरज बजाजले खरिद गरेको अपार्टमेन्ट लोधा मालाबार प्यालेसमा छन्, जसमा ३१ तला छन् । पेन्टहाउस अपार्टमेन्ट खरिद गर्ने सम्झौताका लागि १५.१५ करोड भारु अर्थात् २४ करोड २४ लाख नेपाली रुपैयाँ स्ट्याम्प शुल्क तिरको प्रतिवेदनमा उल्लेख छ ।