मधेश प्रदेशकै पहिलो पाँचतारे बन्यो ‘होटल इच्छा’, डेढ अर्ब लगानी

काठमाडौं । बाराको सिमरामा सञ्‍चालित होटल इच्छा पाँचतारा स्तरमा वर्गीकरण भएको छ ।  स्तरोन्‍नतीसँग होटल इच्छा मधेश प्रदेशकै पहिलो र एकमात्र पाँचतारे होटल बनेको छ ।

चारतारे स्तरमा मिनी क्यासिनोसहित ६ वर्षअघि सञ्‍चालनमा आएको होटल इच्छालाई  पर्यटन बोर्डले पाँचतारे होटलको अनुमित दिएको हो ।

घरजग्गा व्यवसायी इच्छा बहादुर वाग्लेले सुरुवातमा एक अर्ब २० करोड रुपैयाँ लगानी गरी ६० कोठाको होटल सञ्‍चालनमा ल्याएका थिए । हालै ३० करोड रुपैयाँ लगानीमा ४० कोठा थपेर १०० कोठा पुर्‍याइएको इच्छा हस्पिटालिटी समूहले जनाएको छ । 

सिमरा एयरपोर्टबाट २ किमी र हेटौंडाबाट ३५ किमी दुरीमा रहेको होटल २ विगाहा क्षेत्रफलमा फैलिएको छ ।

 इच्छा हस्पिटालिटी समूहले बारा पर्सा राष्ट्रिय निकुञ्‍ज अमलेखगञ्‍ज हात्तीसार पर्यटन क्षेत्रमा गार्डेन सफारी रिसोर्ट सञ्‍चालनमा ल्याउँदै छ । अहिले धमाधम निर्माण भइरहेको रिसोर्ट २०२८ भित्रै सञ्‍चालनमा ल्याउने वाग्लेले बताए ।

काठमाडौं तराई फास्ट ट्रयाक, प्रस्तावित निजगढ अन्तर्राष्ट्रिय विमानस्थल, औद्योगिक कोरिडोर र पर्सा राष्ट्रिय निकुञ्‍ज लगायतलार्य दृष्टिगत गरी रिसोर्ट सञ्‍चालनमा ल्याउन लागेको उनको भनाई छ ।

यस्तै, होटेल इच्छामा भारतको रक्सौल, मोतिहारी, मजुफ्पुर, दरभंगा, मधुवनी, बेतिया र पट्नालगायत क्षेत्रबाट पर्यटक आउने गर्छन् । यस्तै, औद्योगिक क्षेत्र बारा पर्सामा आवतजावत गर्ने व्यवसायी पनि इच्छामै बस्‍ने गर्छन् ।

यतिसम्म कि, उद्योगी व्यवसायीहरु काठमाडौंबाट प्लेनमा सिमरा अवतरण गरेर सिधै होटल इच्छामा गएर ब्याग विसाउन पुग्छन् । र, वीरगञ्जमा गएर दिनभर काम गर्ने र रातमा बस्‍न होटल इच्छामा फर्किने गर्छन् ।

होटल इच्छाका सञ्चालक एवं हाउजिङ तथा रियलस्टेट व्यवसायी वाग्ले नेपाल जग्गा तथा आवास विकास संघका अध्यक्ष हुन् ।