महालक्ष्मी विकास बैंकले घर खरिद गर्न वा घर निर्माण गर्न इच्छुकलाई लक्षित गरी आवास कर्जा र उद्यम गर्न इच्छुकलाई व्यावसायिक कर्जाअन्तर्गत सुलभ ब्याजदरमा कर्जा योजना ल्याएको हो ।
काठमाडौं । बैंकमा तरलता बढ्न थालेपछि बैंकको कर्जाको ब्याजदर पनि क्रमशः घट्न थालेको छ । पछिल्लो समय विकास बैंकले नै १३ प्रतिशत ब्याजदरमै घरकर्जा उपलब्ध गराउने स्किम ल्याउन थालेका छन् ।
महालक्ष्मी विकास बैंकले ‘नयाँ वर्ष, नयाँ वर्ष सुलभ कर्जा’ भन्दै १२.९९ प्रतिशत ब्याजदरमा घरकर्जा योजना सार्वजनिक गरेको छ ।
घर खरिद गर्न वा घर निर्माण गर्न इच्छुकलाई लक्षित गरी आवास कर्जा र उद्यम गर्न इच्छुकलाई व्यावसायिक कर्जाअन्तर्गत सुलभ ब्याजदरमा कर्जा योजना ल्याएको छ ।
बैंकले दुवै कर्जा योजनामा १२.९९ प्रतिशतको आकर्षक ब्याजदरमा कर्जा प्रवाह गर्नेछ । यस्तै, नयाँ वर्षको अवसरमा कर्जा सेवा शुल्कमा विशेष छुट प्रदान गर्ने छ ।
महिला सशक्तीकरणमा जोड दिँदै बैंकले घरधनी वा व्यवसायधनी महिला भएमा सेवा शुल्कमा ०.२५ प्रतिशत छुट प्रदान गर्ने जनाएको छ ।
बैंकले घर निर्माण लागतको शतप्रतिशत कर्जा प्रवाह गर्नेछ भने कर्जाको अधिकतम अवधि पनि ३० वर्ष राखिएको छ । घर निर्माणमा अग्रिम कर्जा प्रवाह तथा सेवा शुल्कमा छुटजस्ता आकर्षक सुविधाहरू प्रदान गर्ने बैंकले जनाएको छ ।
घर खरिद गर्न अथवा घर निर्माण गर्न र स्वदेशमै उद्यम गर्न चाहनेहरूका लागि लाभदायक महालक्ष्मी आवास कर्जा र महालक्ष्मी व्यावसायिक कर्जा आकर्षक ब्याजदरमा बैंकका सम्पूर्ण शाखाहरूबाट उपलब्ध हुनेछन् ।
एनएमबि बैंकको ११.९९ प्रतिशत ब्याजदर
यसअघि नै एनएमबि बैंकले ११.९९ प्रतिशत स्थिर (फिक्स) ब्याजदरको घरकर्जा योजना ल्याएको छ ।
१५ वर्ष अवधिसम्मको यो नयाँ घरकर्जा योजनाले घरधनीहरूलाई कर्जाको स्थिर मासिक भुक्तानीको साथै व्यक्तिको दीर्घकालीन वित्तीय योजनामा समेत मद्दत पु र्याउने बैंकको विश्वास छ ।
उक्त योजनाले लामो अवधिको लागि कम र अनुमानित ब्याज दर सुरक्षित गर्न मद्दत पु र्याउने छ ।
यस कर्जा योजनाले नयाँ ग्राहकहरू कुनै पनि बजार उतार–चढाव वा ब्याज दरहरूमा परिवर्तन भएता पनि उनीहरूको मासिक भुक्तानी ऋण अवधिसम्म स्थिर रहनेछ भनी विश्वस्त हुन सक्ने बैंकले जनाएको छ ।