नयाँ शहर निर्माण र शहरी पूर्वाधार विकास गर्न साढे ११ अर्ब बजेट बिनियोजन

काठमाडौं । सरकारले देशका विभिन्‍न ठाउँमा अगाडि बढाइएका नयाँ शहर आयोजना, सघन शहरी विकास कार्यक्रमअन्तर्गत निर्माणाधीन शहरी पूर्वाधार आयोजना र पर्यटकीय शहरका कोरिडोरमा रहेका नगरपालीकाहरुमा शहरी पूर्वाधार निर्माण गर्न ११ अर्ब ३६ करोड रुपैयाँ बजेट बिनियोजन गरेको छ ।

अर्थमन्त्री डा. प्रकाशशरण महतले संसदमा आगामी आर्थिक वर्षको बजेट प्रस्तुत गर्दै सुरक्षित, स्वच्छ, व्यवस्थित र आर्थिक रूपमा गतिशील शहर निर्माणका लागि गुणस्तरीय शहरी पूर्वाधार सेवा तथा सुविधा उपलब्ध गराउने गरी शहरी विकासतर्फको बजेट केन्द्रित गरेको बताए ।

बसन्तपुर, खुर्कोट, चौरजहारी, बैतडी–पाटन लगायतका नयाँ शहर आयोजनाको पूर्वाधार निर्माण कार्यका लागि २ अर्ब १९ करोड विनियोजन गरिएको छ । यस्तै, सुर्खेत जिल्लाको भेरीगंगा उपत्यकाको एकीकृत शहरी विकासको गुरुयोजना तर्जुमा गरी निर्माण कार्य अगाडि बढाउने पनि अर्थमन्त्री महतले घोषणा गरेका छन् । 

यस्तै, सघन शहरी विकास कार्यक्रम अन्तर्गत निर्माणाधीन शहरी पूर्वाधार आयोजना सम्पन्‍न गर्न ८ अर्ब ४ करोड विनियोजन गरिएको छ । यसअन्तर्गत सघन वस्ती भएका नगर क्षेत्रमा सडक, ढल निर्माण लगायतका पूर्वाधार विकासका कार्यक्रम सञ्‍चालन गरिने अर्थमन्त्री महतले बताए ।

मुख्य पर्यटकीय शहरहरू पोखरा, जनकपुर र लुम्बिनी कोरिडोरमा रहेका नगरपालिकाहरूमा एकिकृत शहरी पुर्वाधार निर्माण गर्न १ अर्ब १३ करोड  विनियोजन गरिएको छ । 

चितवनको सौराहा क्षेत्रमा साइकल लेन निर्माण गर्ने अर्थमन्त्री महतले घोषणा गरेका छन् ।

आगामी वर्ष संसद भवन निर्माण सम्पन्‍न गर्ने

सकारले सिंहदरबारभित्र निर्माण गरिरहेको संघीय संसद भवनको निर्माण कार्य आगामी आर्थिक वर्षमा सम्पन्‍न गर्ने लक्ष्य लिएको छ ।

भवनको आन्तरिक पूर्वाधार लगायतका बाँकी काम सम्पन्‍न गर्न १ अर्ब २२ करोड बजेट व्यवस्था गरेको अर्थमन्त्री महतले बताएका छन् । 

०७९ फागुन मसान्तसम्म संघीय संसद भवन निर्माण कार्य ६१ प्रतिशत सम्पन्‍न भएको आइतबार सार्वजनिक गरिएको ‘आर्थिक सर्वेक्षण ०७९–८०’ मा उल्लेख छ ।

Photo: Onlinekhabar