३० फोटोमा हेर्नुहोस् ‘दोर्जे रिसोर्ट’, जहाँ बस्‍न दिनकै ५० हजारभन्दा धेरै खर्चिनु पर्छ

काठमाडौं । कोभिड महामारीपछि निर्माण सुरु गरिएको पोखराको ‘दोर्जे रिसोर्ट एन्ड स्पा’ चरम मन्दीको समयमा सञ्‍चालनमा आएको छ । दुई हप्ताअघि सञ्‍चालनमा ल्याइएको रिसोर्ट पोखराको सेदीमा रहेको छ ।

२५ वर्षदेखि लेकसाइडमा ‘मुन डान्स रेष्टुरेन्ट’ सञ्‍चालन गरिरहेका दोर्जे लामाले रिसोर्ट सञ्‍चालनमा ल्याएका हुन्, जसमा जग्गासहित करिव एक अर्ब लगानी भएको छ ।

रिसोर्ट हाई एन्ड पर्यटकलाई लक्षित गरेर सञ्‍चालनमा ल्याइएको हो । रिसोर्टमा एक दिन बस्‍नका लागि कम्तिमा ५० हजार रुपैयाँ खर्च गर्नुपर्ने हुन्छ । 

रिसोर्ट सञ्‍चालनको अवसर पारेर ‘इन्ट्रोडक्टरी प्राइस’ भनेर प्रतिदिन २० हजार रुपैयाँ तोकेको सञ्चालक दोर्जेले बताए । 

पर्यटक आकर्षित गर्ने उद्देश्यसहित मौलिक र आधुनिक शैलीको फ्युजन गरी रिसोर्ट निर्माण गरिएको छ । रिसोर्टमा रहेका १३ वटा भिल्लामध्ये सातावटा कोठा छन् भने बाँकी ६ भवनमा स्पा, कन्फ्रेन्स हल, किचन–डाइनिङ, जीम क्लव लगायत सुविधा छन् । 

अहिले रिर्सोटमा १९ डिलक्स र ४ वटा सुइट गरी २३ वटा कोठा तयार भइसकेका छन् । निकट भविष्यमै आठवटा कोठा थप्‍ने सञ्‍चालक दोर्जेको तयारी छ । मौलिक नेपाली ढुंगा कुँदेर रिर्सोट निमार्ण गरिएको छ ।

रिसोर्टमा शरदकालिन सिजनका लागि प्रतिकोठा प्रतिदिन मूल्इ ५०० देखि ८०० अमेरिकी डलरसम्म तोकिएको छ । रिसोर्टमा स्वीमिङ पुल, ज्याकुजी, स्पा, जिमलगायत सुविधा छन् । रिसोर्टका प्रत्येक कोठाबाट फेवातालको सुन्दर दृश्य देख्‍न पाइन्छ । 

फोटो स्रोतः दोर्जे रिसोर्ट एन्ड स्पा