एनआइसी बैंकले ल्यायो ‘अठोट घरकर्जा’ योजना, अन्य बैंकमा रहेको कर्जा पनि सार्न सकिने

काठमाडौं । बजारको माग अनुसार बदलिदो समय एवं नयाँ आकर्षक योजनाहरु समेट्दै आएको एनआईसी एसिया बैंकले तीन प्रकारका कर्जा योजना सार्वजनिक गरेको छ । 

बैंकले ग्राहकहरुका लागि अठोट घरकर्जा, अठोट साना व्यवसाय कर्जा र अठोट शेयर धितो कर्जा योजना ल्याएको हो । न्यूनतम २५ लाखदेखि अधिकतम १२ करोड रुपैयाँसम्मको अठोट घरकर्जा योजना ल्याएको बैंकले जनाएको छ । 

२५ वर्षसम्म कर्जा अवधि रहेको यस अठोट घरकर्जा ग्राहकहरुले आकर्षक तथा न्यूनतम ब्याजदरमा उपभोग गर्न सक्ने बैंकको भनाई छ । तर, अठोट घरकर्जाको ब्याजदर भने सार्वजनिक गरिएको छैन ।

बैंकका अनुसार यस योजनाअन्तर्गत ग्राहकले निजी आवासीय घर खरिद गर्न, निजी आवासीय अपार्टमेन्ट खरिद गर्न, निजी आवासीय घर निर्माण गर्न, निजी आवासीय घर मर्मत तथा तला थप्न र निजी आवासीय घर निर्माण गर्नका लागि जग्गा खरिद गर्न अठोट घरकर्जा सुविधा उपयोग गर्न सक्नेछन् ।

साथै, अन्य बैंक तथा वित्तीय संस्थामा रहेको व्यक्तिगत आवासीय घरकर्जा यस बैंकको अठोट घरकर्जामा स्वापः गर्न पनि सकिने व्यवस्था बैंकले गरेको छ ।

बैंकले व्यवसाय सञ्चालन तथा विस्तार गर्नका लागि ल्याएको अठोट साना व्यवसाय कर्जामा न्यूनतम २५ लाखदेखि अधिकतम ५ करोडसम्म कर्जा उपलब्ध हुनेछ । अधिकतम १५ वर्ष कर्जा अवधि कायम गरिएको यस कर्जामा आकर्षक तथा न्यूनतम ब्याजदर कायम गरेको बताइएको छ ।

साना तथा मझौला व्यवसाय तथा कृषि व्यवसायहरुलाई लक्षित गरी ल्याएको यस कर्जाअन्तर्गत लगानीकर्ताहरुले सञ्‍चालित वा नयाँ व्यवसायहरुको अल्पकालीन वा दीर्घकालीन लगानी आवश्यकताका लागि यो कर्जा उपभोग गर्न सक्नेछन् । 

यस्तै, बैंकले ल्याएको न्यूनतम ५० लाखदेखि अधिकतम १२ करोडसम्मको अठोट शेयर धितो कर्जाको हकमा समेत आकर्षक तथा न्यूनतम ब्याजदर लाग्नेछ भने यस कर्जामा १ वर्षको भुक्तानी अवधि (वार्षिक रुपमा नवीकरण गर्न सकिने) रहेको छ ।

एनआईसी एशिया बैंकका देशभर ३६० शाखा कार्यालय, ५६७ एटिएम, ११० वटा विस्तारित काउन्टर एवं ६१ वटा शाखारहित शाखा सञ्जाल छन् ।

देशको कुल जनसंख्यामध्ये २० वर्षदेखि ५० वर्ष उमेर समूहसम्मको आर्थिक रूपमा सक्रिय जनसंख्याको करिब २५ प्रतिशत जनतालाई सेवा दिन बैंक सफल भएको छ । 

बैंकले स्थापनाकालदेखि हालसम्ममा प्रत्यक्ष र अप्रत्यक्ष गरी कुल २३ अर्ब ५८ करोडभन्दा बढी राजश्व नेपाल सरकारलाई भुक्तानी गरेको छ । गत आर्थिक वर्षमा ३ अर्ब ६६ करोडभन्दा बढी राजश्‍व सरकारलाई बुझाउन बैंक सफल भएको छ । 

वित्तीय समावेशीकरणका लागि मुगु, कालिकोट, बझाङ, रूकुम, जुम्ला, सल्यानजस्ता बैंक तथा वित्तीय संस्थाहरूको उपस्थिति न्यून रहेका दुर्गम जिल्लाहरूमा तथा कुनै पनि बैंक तथा वित्तीय संस्थाहरू नपुगेको ३४ भन्दा बढी स्थानीय निकायहरूमा शाखा विस्तार गरी सञ्‍चालन गर्दै आइरहेको छ । 

देशको कुल जनसंख्याको ८० प्रतिशतभन्दा बढी बसोबास गर्ने ग्रामीण तथा साना सहरी क्षेत्रमा बैंकले आफ्ना ७२ प्रतिशत शाखा कार्यालयहरू स्थापना गरेको छ ।