यस्तो बन्यो सुकेधारामा साढे दुई अर्बको पाँचतारे होटेल, माघदेखि सञ्‍चालन

काठमाडौं । सुकेधारमा निर्माण भइरहेको पाँचतारे होटेल फेब्रुअरी २०२४ देखि सञ्‍चालनमा आउने भएको छ । 

नेपाल उद्योग वाणिज्य महासंघका केन्द्रीय सदस्यसमेत रहेका व्यवसायी देशबन्धु बस्‍नेतसहितको टिमले सुकेधारमा पाँचतारे होटेल सञ्‍चालनमा आउन लागेका हुन् । 

होटेल सञ्‍चालनमा आइसक्दा करिव तीन अर्ब रुपैयाँ लगानी हुने अनुमान छ । होटेलमा बस्‍नेका ४५ प्रतिशत र बाँकी राजेन्द्र राउत र बिजय मल्लको लगानी छ । होटेल निर्माण कार्य ९८ प्रतिशत सम्पन्‍न भइसकेको बताइएको छ ।

द मेट्रोपोलिटन होटेल प्रालिले सञ्‍चालन गर्ने होटेलमा १०६ कोठा हुनेछन् भने पूर्ण क्षमताको क्यासिनो पनि सञ्‍चालनको तयारी छ । 

फ्रान्सेले होटेल व्यवस्थापन कम्पनी एकोर ग्रुपले ‘मेक्योर काठमाडौं’ ब्रान्डमा होटेल सञ्‍चालन गर्ने समझदारी भइसकेको छ ।

१० तला अग्लो होटेलमा अहिले इन्टेरियर डिजाइन तथा फिनिसिङ, प्लम्बिङ, विद्युतीकरण लगायतका कामहरु भइरहेका छन् ।

होटेलमा रेष्टुरेन्ट, स्वीमिङ पुल, कन्फ्रेन्स हल, हेल्थ क्लब, साउन, ब्यांक्वेट हल, टेरेस बार लगायतका सुविधाहरु हुनेछन् ।  कम्पनीले १ अर्ब ९७ करोड ५० लाख कर्जाका लागि इन्फोमेरिक्स क्रेडिट रेटिङ कम्पनीबाट रेटिङ गराएको छ ।