अहिले बजारमा सिमेन्ट र डन्डीको मूल्य कति छ ?

काठमाडौं । निर्माण क्षेत्र अझै पनि लयमा नफर्किदा निर्माण सामाग्रीको बिक्री बढ्न सकेको छैन । अहिले पनि सिमेन्ट तथा डन्डी उद्योगहरु आधाभन्दा कम क्षमतामा सञ्चालन भइरहेका छन् ।

बजारमा निर्माण सामाग्रीको माग नबढेपछि मूल्य पनि बढ्न नसकेको सौरभ समूहका अध्यक्ष विष्णु न्यौपानेले बताए । ‘पहिल्यैदेखि दशैं–तिहारको सिजन भनेको निर्माण सामाग्रीको माग घट्ने समय हो,’ उनले भने, ‘तिहारपछि निर्माण क्षेत्रले गति समात्ला कि भन्‍ने अपेक्षा छ ।’

अहिले सिमेन्ट उद्योगले पीपीसी सिमेन्ट भ्याटसहित प्रतिबोरा ४ सय रुपैयाँ र ओपीसी सिमेन्ट ५ सय रुपैयाँ हाराहारीमा डिलरलाई बिक्री गरिरहेका छन् । ब्रान्डअनुसार मूल्यमा केही तलमाथि हुन सक्छ ।

ढुवानी खर्च र डिलरले राख्‍ने नाफा जोड्दा पीपीसी सिमेन्ट ६ सय र ओपीसी सिमेन्ट ७ सय रुपैयाँको हाराहारीमा उपभोक्ताले पाउँछन् । 

मन्दीका कारण लामो समयदेखि सिमेन्ट उद्योगीले परल मूल्यमा सिमेन्ट बिक्री गरिरहेको व्यवसायीले बताएका छन् । यो बिचमा सिमेन्ट उत्पादक संघले प्रतिबोरा ५० रुपैयाँका दरले मूल्य बढाउने तयारी गरेको थियो । तर, बजारमा माग नै नबढेका कारण संघले मूल्य पनि बढाउन सकेन । 

टिएमटी डन्डीको मूल्य भने अन्तर्राष्ट्रिय बजारसँग निर्भर हुन्छ । डन्डी बनाउने फलाम आयात गर्नुपर्ने भएकोले अन्तर्राष्ट्रिय बजारमा हुने मूल्य थपघटसँग नेपालको बजार पनि प्रत्यक्ष प्रभावित हुन्छ । तर, सिमेन्ट स्वदेशी कच्चा पदार्थमा आधारित हुँदा अन्तर्राष्ट्रिय बजार मूल्यले प्रभाव पार्दैन ।

अहिले डन्डी उद्योगले कारखानाबाट भ्याटबाहेक ८३ रुपैयाँ प्रतिकिलोका दरले डिलरले डन्डी बिक्री गरिरहेका छन् । यो मूल्य ब्रान्ड हेरिकन पाँच रुपैयाँसम्म तलमाथि हुन सक्छ ।

भ्याट, ढुवानी खर्च र डिलरको नाफासहित सय रुपैयाँभन्दा कम मूल्यमै उपभोक्ताले डन्डी खरिद गर्न पाउने सर्वोत्तम स्टिलका सञ्‍चालक रहेका न्यौपानेले बताए । कतिपय ब्रान्डको मूल्य १०५ रुपैयाँसम्म रहेको छ । खासगरी, हिमाल, हामा, पञ्‍चकन्या लगायत ब्रान्डले पाँचदेखि १० रुपैयाँसम्म बढी मूल्यमा डन्डी बिक्री गर्दै आएका छन् । 

कोभिडपछि अन्तर्राष्ट्रिय बजारमा कच्चा फलामको मूल्य बढ्दा डन्डीको मूल्य प्रतिकिलो १४० रुपैयाँसम्म पुगेको थियो । तर, पछिल्लो समय अन्तर्राष्ट्रिय बजारमै फलामको मूल्य घट्दा नेपाली उपभोक्ताले सरदर सय रुपैयाँ हाराहारीमा टिएमटी डन्डी किन्‍न पाउँछन् ।