चार अर्बको कजरिया टायल उद्योग ६ महिनाभित्र सञ्चालन, एभरेष्ट बैंकको अगुवाईमा सहवित्तीयकरण हुने

काठमाडौं । भारतीय कम्पनीसँगको साझेदारीमा स्थापना भइरहेको कजरिया रमेश टायल्स उद्योगले ६ महिनाभित्र उत्पादन सुरु गर्ने भएको छ । करिव चार अर्ब लगानी हुने उद्योगमा भारतीय कजरीया सेरामिक्स र नेपाली रमेश कर्पको ५०/५० प्रतिशत लगानी हुनेछ ।

वार्षिक ८० लाख वर्गमिटर टायल उत्पादन क्षमता भएको उद्योगमा एभरेष्ट बैंकको अगुवाइमा विभिन्न बैंक मिलेर ऋण लगानी गर्ने भएका छन् । सहवित्तीयकरणमा नबिल बैंक, नेपाल एसबिआई बैंक र प्रभु बैंकले लगानी गर्ने भएका हुन् । 

उद्योगमा लगानी सम्बन्धी सम्झौतापत्रमा एभरेष्ट बैंकका सिइओ सुदेश खालिङ र रमेश कर्पका तर्फबाट उपाध्यक्ष रोहित गुप्ताले हस्ताक्षर गरेका छन् । सम्झौता कार्यक्रममा सहवित्तीयकरणका अन्य सदस्य बैंकका उच्चपदस्थ अधिकारीको उपस्थिति रहेको थियो ।

नेपाललाई टायल उत्पादनमा आत्मनिर्भर बनाउने उद्देश्यका साथ नवलपरासीमा रहेको प्लान्टमा बैंकहरुले तीन अर्ब कर्जा लगानी गर्नेछन् भने बाँकी सञ्चालकको इक्विटी रहनेछ । 

नेपालमा आधुनिक उपकरण प्रयोग गरी गुणस्तरीय टायल तथा सेरामिक्सका अन्य उत्पादन अन्तर्राष्ट्रिय मापदण्डबमोजिम गुणस्तरीय हुने कम्पनीको दाबी छ । 

नेपाललाई भिट्रिफाइड टाइल्स र सेरामिक उत्पादनमा आत्मनिर्भर बनाउने दूरदर्शी प्रतिबद्धताका साथ कजारिया रमेश टाइल्सले नेपालमा टाइल उत्पादनका लागि ग्रिनफिल्ड परियोजना सुरु गरेको हो ।

नवलपरासी क्षेत्रमा अवस्थित अत्याधुनिक उत्पादन उद्योग ८० लाख वर्गमिटरको उत्पादन क्षमता भएको नेपालको सबैभन्दा ठूलो टायल उद्योग हुने कम्पनीको दाबी छ । 

यस उद्योगले देशमा हुने टायल्सको माग पूरा गरी आयात प्रतिस्थापन गर्नेमा महत्वपूर्ण योगदान गर्ने कम्पनीले विश्वास व्यक्त गरेको छ ।