सस्तिन थाल्यो बैंकको कर्जा, साढे १० प्रतिशत स्थिर ब्याजमा घरकर्जा

काठमाडौं । बैंक तथा वित्तीय संस्थाहमा लगानीयोग्य रकम (तरलता) बढ्दै गएपछि कर्जाको ब्याजदर घट्न थालेको छ । मुद्दती बचतको ब्याजदर एकल बिन्दूमा झर्न थालेपछि कर्जा पनि सस्तिन थालेको हो ।

अहिले बैंकहरु कम ब्याजदर राखेर कर्जाका स्किम ल्याउन प्रतिस्पर्धा गर्न थालेका छन् । बैंकले १० प्रतिशतको लाइनमा फिक्स रेट (स्थिर ब्याजदर)को घरकर्जाका स्किम सार्वजनिक गरिरहेका छन् । 

जबकी, यसअघि बैंकमा तरलता अभाव भएर घरकर्जाको ब्याजदर १८ प्रतिशतसम्म पुगेको थियो । तैपनि बैंकबाट कर्जा पाउनु भनेको भगवान भेट्याउनु सरह थियो । अहिले बैंकले बचत थुप्रिन थालेपछि ग्राहकलाई फोन गरेरै कर्जा लिइदिन आग्रह गर्न थालेको बताइन्छ ।

निजी क्षेत्रको अग्रणी नबिल बैंकले स्थिर ब्याजदरको ‘नबिल सस्टेनेवल हाउजिङ लोन’ स्किम ल्याएको छ । १०.४९ प्रतिशत स्थिर ब्याजदर तोकिएको यो कर्जा सात वर्षसम्मका लागि पाइने छ । 

तर, यो कर्जा लिनका लागि केही शर्तहरु पालना गर्नुपर्ने हुन्छ । इको फ्रेन्ड्ली सुविधाहरु वाटर हार्भेस्टिङ, वाटर म्यानेजमेन्ट, उर्जा किफायती सामाग्रीको प्रयोज, वैकल्पिक उर्जाको प्रयोग, अन्डरग्राउन्ड एयर कन्डिसन सिष्टम जडान गरेका घरलाई कर्जा उपलब्ध गराउने जनाएको छ ।

यस्तै, निजी क्षेत्रकै ग्लोबल आइएमई बैंकले १०.९९ प्रतिशत स्थिर ब्याजदर घरकर्जा स्किम ल्याएको छ । यो कर्जा ग्राहकले आवश्यक सम्पूर्ण कागजात पेश गरेको तीन दिनमै स्वीकृत गर्ने बैंकले जनाएको छ ।

एनमबि बैंकले स्थिर ब्याजदरको ‘शुलभ घरकर्जा’ स्किम सार्वजनिक गरेको छ । बैंकले १० वर्षसम्मका लागि १०.४९ प्रतिशत स्थिर ब्याजदर (फिक्स रेट) को घरकर्जा योजना ल्याएको हो । 

‘हुनेछ सुरुवात समृृद्ध भविष्यको, जब बन्छ घर आफ्नै सपनाको’ भन्‍ने नारासहित बैंकले सस्तो ब्याजदरको घरकर्जा योजना ल्याएको जनाएको छ । 

बैंकले ल्याएका सुलभ ब्याजदरका कर्जा स्किमले घर खरिद गर्न वा निर्माण गर्ने योजनामा रहेका ग्राहकहरु लाभान्वित हुनेछन् । यो स्किम अन्तर्गत घरकर्जा लिँदा बजारमा जतिसुकै उतारचढाव आएपनि ब्याजदर तलमाथि हुने छैन् । 

पिक्स रेटको ब्याजरले ग्राहकलाई आफ्नो आम्दानीअनुसार ढुक्क भएर कर्जा लिने योजना बनाउन पनि सहज हुने अनुमान छ ।