बैंकर्स संघका अध्यक्षले भने– ‘कर्जाको ब्याज एक प्रतिशतले घट्यो, अझै घट्दै जानेछ’

काठमाडौं । बैंक तथा वित्तीय संस्थाहरुमा तरलता बढ्दै गएपछि कर्जाको ब्याजदर पनि घट्न थालेको छ । अहिले कर्जाको ब्याजदर एक प्रतिशतले घटेको बैकर्स संघका अध्यक्ष सुनिल केसीले बताए ।

शुक्रबार राजधानीमा आयोजित एक कार्यक्रममा अध्यक्ष केसीले बैंकको आधारदर (बेसरेट) एकल अंकमा रहेको जानकारी गराए । उनले भने, ‘ब्याजदर अझै घट्दै जाने छ ।’

अहिले बैंकहरुले बचतको ब्याजदर घटाउँदै लगेका छन् । बचतको ब्याजदर घटेसँगै बैंकको कस्ट अफ फन्ड पनि घट्दा आधार दर पनि घट्दै गएको हो । बैंकले आधार दरमा केही प्रतिशत प्रिमियम जोडेर कर्जाको ब्याजदर तोक्दै आएका छन् । 

कार्यक्रममा राष्ट्र बैकका गभर्नर महाप्रसाद अधिकारीले ऋणीसँग कुनै बैंकले बढि ब्याज लिएको भए राष्ट्र बैंकलाई जानकारी गराउन अनुरोध गरे । बैंकले बढी ब्याज लिएको पाए राष्ट्र बैकले फिर्ता गराउने उनको प्रतिवद्धता छ । 

गभर्नर अधिकारीले गत आर्थिक वर्षमा बढी लिएको चार अर्ब ७६ करोड रुपैयाँ ब्याज फिर्ता गराएको स्मरण गराए । उनले बैंकहरुले बढी ब्याज लिए भनेर तथ्यभन्दा बाहिर गएर गुनासो नगर्न समेत सबैलाई आग्रह गरे । उनले बजेटमा भएका कुरालाई राष्ट्र बैंकले मौद्रिक नीति मार्फत सहयोग गरिरहेको बताए । 

आर्थिक सिथिलताका कारण बैंकको खराब कर्जा बढ्ने भन्दै यस्तो बेला बैंकहरुले प्रोभिजन बढाउनु पर्ने भएकाले राष्ट्र बैंकले टाइट गरेको गभर्नर अधिकारीको भनाई छ । ‘खराब कर्जा नबढोस भनेर टाईट गरेको हो’ उनले भने ‘दक्षिण एसियाको तुलनामा नेपालमा खराब कर्जा कम छ ।’ 

नेपाल उद्योग परिसंघका अध्यक्ष राजेश अग्रवालले अर्थतन्त्र समस्यामा रहेको सरकार र राष्ट्र बैंकले स्विकार गर्नुपर्ने बताए । यसलाई स्विकार गरेर समाधानमा जानुपर्ने उनको भनाई छ । 

अध्यक्ष अग्रवालले राष्ट्र बैंकको सञ्‍चालक समितिको सदस्य पहुँचको आधारमा भन्दा विज्ञताको आधारमा हुनुपर्ने बताए । उनले अहिलेको अवस्थामा राष्ट्र बैंक माईक्रोम्यानेजमेन्ट तिर लागेको बताए । अझै पनि अर्थतन्त्र सुधारका लागि जे गर्छन पशुपतिनाथले पाउँछन् भनेर बस्‍न नहुने उनको भनाई छ ।