‘सिंगल डिजिट’मै झर्‍यो घरकर्जाको ब्याजदर

काठमाडौं । बचतसँगै कर्जाको ब्याजदर घटाउन बैंक तथा वित्तीय संस्थाहरुबीच प्रतिस्पर्धा चल्न थालेको छ । अहिले कतिपय वाणिज्य बैंकले घरकर्जाको ब्याजदर ‘सिंगल डिजिट’मा झारिसकेका छन् ।

नबिल बैंकले ७ वर्षसम्म स्थिर रहने गरी ९.९९ प्रतिशत फिक्स ब्याजदरमा घरकर्जा योजना ल्याएको छ । सुलभ ब्याजदरको ‘नबिल ढुक्क घरकर्जा’ योजनामार्फत ३० वर्षसम्मका लागि कर्जा लिन सकिने छ । 

बैंकमा चरम तरलता अभाव सिर्जना भएपछि गत वर्ष वाणिज्य बैंकहरुकै कर्जाको ब्याजदर १८ प्रतिशतसम्म पुगेको थियो । अहिले विकास बैंककै कर्जाको ब्याजदर ११/१२ प्रतिशत बिन्दूमा झरिसकेको छ ।

ब्याजदर घटेसँगै घरजग्गा क्षेत्रमा कर्जा लगानी बढ्ने र लामो समयदेखि सुस्ताएको घरजग्गा कारोबारमा सुधार आउने अपेक्षा गरिएको छ । राष्ट्र बैंकले पनि घरजग्गा क्षेत्रमा जाने कर्जा प्रवाहमा सहजीकरण गरेको छ । पहिलो त्रैमासिक मौद्रिक समिक्षामार्फत राष्ट्र बैंकले घरजग्गा धितो कर्जाको जोखिमभार १५० प्रतिशतबाट घटाएर १२५ प्रतिशत कायम गरेको छ ।

फिक्स रेटमा कम ब्याजदर

बैंक तथा वित्तीय संस्थाहरुले कम ब्याजदर कायम गरी फिक्स रेटको कर्जा योजना ल्याउन तछाडमछाड गरिरहेको देखिन्छ । यही क्रममा सिटिजन्स बैंक इन्टरनेशनलले १०.९९ प्रतिशत स्थिर ब्याजदरको घरकर्जा योजना ल्याएको छ । 

ऋणीले ७ बर्षसम्म एउटै १०.९९ प्रतिशत ब्याजदर तिरे पुग्छ । ‘सपनाको घरलाई दिनुहोस् आकार, सिटिजन्स घरकर्जाले पार्नेछ सपना साकार’ योजना अन्तर्गत बैंकले यस्तो घरकर्जा स्किम ल्याएको हो ।

यस्तै, एनमबि बैंकले स्थिर ब्याजदरको ‘शुलभ घरकर्जा’ स्किम सार्वजनिक गरेको छ । बैंकले १० वर्षसम्मका लागि १०.४९ प्रतिशत स्थिर ब्याजदर (फिक्स रेट) को घरकर्जा योजना ल्याएको हो । 

‘हुनेछ सुरुवात समृृद्ध भविष्यको, जब बन्छ घर आफ्नै सपनाको’ भन्‍ने नारासहित बैंकले सस्तो ब्याजदरको घरकर्जा योजना ल्याएको जनाएको छ । यो स्किमले घर खरिद गर्न वा निर्माण गर्ने योजनामा रहेका ग्राहकहरु लाभान्वित हुनेछन् ।

ग्लोबल आइएमई बैंकले १०.९९ प्रतिशत स्थिर ब्याजदर घरकर्जा स्किम ल्याएको छ ।

‘ख’ बर्गको गरिमा विकास बैंकले ‘मेरो आफ्नै घर’ स्लोगन राखेर ११.९९ प्रतिशत फिक्स ब्याजदरमा घरकर्जा योजना ल्याएको छ । बैंकले आवश्यक सम्पूर्ण कागजात पेश गरेको दुई कार्यदिनमै ऋण स्वीकृत हुने जनाएको छ ।

यस्तै, कामना सेवा विकास बैंकले ११.८५ प्रतिशत ब्याजदरमा घरकर्जा योजना ल्याएको छ । ‘सपनामा हैन अब, वास्तवमै घर समृद्धिको सपनालाई कामना सेवाको भर’ सुलभ ब्याजदरको कर्जा योजना ल्याएको हो ।

कर्जा अवधि २५ वर्षसम्मको हुने र पहिलो घर खरिद गर्नेले ७० प्रतिशतसम्म कर्जा पाउने बैंकले जनाएको छ । यस्तो कर्जा अधिकतम दुई करोड रुपैयाँसम्म लिन पाइने छ ।

ब्याजदर घटबढबाट सधैँ चिन्तामा पर्ने ऋणीहरुले स्थिर ब्याजदरको घरकर्जा योजनाबाट लाभ लिन सक्नेछन् ।