बिहीबारदेखि सुरु हुँदैछ घरजग्गा मेला, प्रधानमन्त्रीले उद्घाटन गर्ने तय

काठमाडौं । कोभिड महामारीपछि पहिलो पटक काठमाडौंको भृकुटीमण्डपमा घरजग्गा मेला आयोजना हुँदैछ । नेपाल जग्गा तथा आवास विकास संघले १२ देखि १५ पुससम्म आठौं रियल इस्टेट एक्स्पो आयोजना गर्न लागेको हो । 

मेलाको सम्पूर्ण तयारी पुरा भइसकेको आयोजक संस्थाले जनाएको छ । रियल इस्टेट एक्स्पोको प्रधानमन्त्री पुष्पकमल दाहाल (प्रचण्ड)ले उद्घाटन गर्ने कार्यक्रम छ ।

संघले कोभिडअघि सातवटा रियल इस्टेट एक्स्पो सफलतापूर्वक आयोजना गरिसकेको छ । कोभिडपछि पहिलो पटक बृहत रियल इस्टेट एक्स्पो आयोजना गर्ने तयारी थालेको संघले जनाएको छ ।

एक्स्पोमा ६० भन्दा बढी स्टलहरु रहने बताइएको छ । एक्स्पोमा एक दर्जनभन्दा बढी रियल इस्टेट व्यवसायीका स्टल रहनेछन् । एक्स्पो अवधिभर करिब एक लाखभन्दा बढी दर्शकहरु आउने अपेक्षा छ ।

नेपाल जग्गा तथा आवास विकास महासंघ प्रवद्र्धक भएर ललितपुर जग्गा तथा आवास विकास संघ र भक्तपुर जग्गा तथा आवास विकास संघको सहआयोजनामा आठौं रियल इस्टेट एक्स्पो आयोजना हुन लागेको हो । 

यो एक्स्पो रियल इस्टेट क्षेत्रका विकासकर्ता र उपभोक्ताहरूबीच एकै स्थलको भेटघाट बिन्दू हुने अपेक्षा गरिएको छ । साथै, मन्दीले थला परेको रियल इस्टेट व्यवसायलाई माथि उठाउन (माहौल सिर्जना गर्न) पनि महत्वपूर्ण भूमिका खेल्ने आयोजकको विश्‍वास छ । 

नेपालमा घरजग्गा बजार र घर खरिदकर्ताहरूलाई लक्षित गरी आयोजना हुन लागेको भए पनि एक्स्पोमा व्यावसायिक र व्यापारिक सम्पत्ति, वास्तुकला, निर्माण, भवन, इन्जिनियरिङ, बैंकिङ र बीमा कम्पनीहरूसहित राष्ट्रिय र अन्तर्राष्ट्रिय प्रदर्शकहरु समेतको सहभागिता हुने बताइएको छ ।

एक्स्पोमा अपार्टमेन्ट र टाउन हाउस कम्प्लेक्स, घडेरी जग्गा, बत्ती तथा विद्युतीय फिक्स्चर, फर्निचर र फर्निसिङ, सिरेमिक, फोहोर व्यवस्थापन, घरजग्गा एजेन्ट, निर्माण सामग्री आपूर्तिकर्ता र वितरक, निर्माण उपकरण तथा सेवाहरू समावेश गरिने छ ।