निर्माण क्षेत्रमा मन्दी कायमै, सिमेन्टको माग अझै बढ्न सकेन

काठमाडौं । मन्दीले निर्माण उद्योग तंग्रिन नसक्दा बजारमा सिमेन्टको माग अझै बढ्न सकेको छैन । नेपाल उद्योग परिसंघले गरेको सर्वेक्षणअनुसार चालु आर्थिक वर्षको पहिलो त्रैमासमा अघिल्लो वर्षको यसै अवधिको तुलनामा सिमेन्टको समग्र माग थप ७.३६ प्रतिशतले घटेको छ । 

अघिल्लो वर्ष ०७९/८० को पहिलो त्रैमासमा सिमेन्टको समग्र माग ४०.१७ प्रतिशतले घटेको थियो । आर्थिक वर्ष ०७८/७९ सँगको तुलनामा हाल सिमेन्टको मागमा कूल ४४.५७ प्रतिशतले गिरावट आएको थियो ।

सिमेन्ट उद्योगको कारोबार रकममा अघिल्लो वर्ष ३९ प्रतिशतले संकुचन आएकोमा चालु आर्थिक वर्षको सोही अवधिमा ९.५४ प्रतिशत गिरावट आएको परिसंघको सर्वेक्षणले देखाएको छ । 

यस्तै, अघिल्लो आर्थिक वर्षमा ८३.३३ प्रतिशत सिमेन्ट उत्पादकहरुले आफ्नो लगानीको योजना स्थगित गरेको बताएकोमा चालु आर्थिक वर्षको पहिलो त्रैमासमा ६२.५० प्रतिशतले आफ्नो लगानीको योजना स्थगित गरेको बताएका छन् ।

निर्माण व्यवसाय १६ प्रतिशतले घट्यो

निर्माण व्यवसाय क्षेत्रका उद्योगीले चालु आर्थिक वर्षको पहिलो त्रैमासमा अघिल्लो वर्षको तुलनामा थप १६.२० प्रतिशतले माग घटेको बताएका छन् । अघिल्लो वर्षको पहिलो त्रैमासमा यस्तो माग ४३.४३ प्रतिशतले घटेको थियो । 

निर्माण क्षेत्रका उद्योगहरुको कारोबार रकम अघिल्लो वर्ष ४३.७१ प्रतिशतले घटेकोमा चालु आर्थिक वर्षको सोही अवधिमा थप २०.८० प्रतिशतले घटेको देखिन्छ । यस्तै, यस क्षेत्रका उद्योगहरुमा ३३.३३ प्रतिशतले लगानी स्थगित गरेको जनाएका छन् । जबकी, अघिल्लो वर्ष ५३.८५ प्रतिशत उद्योगी व्यवसायीले आफ्नो लगानी विस्तारको योजना स्थगित गरेका थिए । 

औद्योगिक उत्पादनको समग्र मागमा १२ प्रतिशतले संकुचन

सर्वेक्षण अनुसार औद्योगिक उत्पादनको समग्र बजार मागमा १२.०६ प्रतिशतले संकुचन आएको छ । अघिल्लो वर्ष यस्तो मागमा २८.२८ प्रतिशतले गिरावट आएको थियो । 

आर्थिक वर्ष ०७८/७९ को पहिलो त्रैमासको तुलनामा ०८०/८१ मा उद्योगहरुको समग्र मागमा कुल ३६.९३ प्रतिशतले संकुचन आएको छ । यस्तै, उद्योगहरुको कारोबार रकम अघिल्लो वर्ष २४.९४ प्रतिशतले घटेकोमा चालु आर्थिक वर्षको समान अवधिमा थप ७.४६ प्रतिशतले घटेको छ ।

परिसंघको यस सर्वेक्षणअनुसार अघिल्लो आर्थिक वर्षको तुलनामा चालु आर्थिक वर्षको पहिलो त्रैमासमा अर्थतन्त्रमा सुधार आएको देखिँदैन । समग्र बजार माग खस्किएको देखिएको छ । कच्चा पदार्थको मूल्य निरन्तर उकालो लागिरहेको छ । उद्योगको कच्चा पदार्थको आयातमा समेत गिरावट आएको देखिन्छ ।