झन घट्यो अपार्टमेन्ट किनबेच, १० महिनामा ३०२ युनिट किनबेच

काठमाडौं । नेपालमा अपार्टमेन्ट खरिद बिक्री निरासाजनक देखिएको छ । माघ महिनामा २५ युनिटमात्र अपार्टमेन्ट बिक्री भएको भूमि व्यवस्थापन विभागको तथ्यांक छ । यो संख्या अघिल्लो महिना पुसको तुलनामा तीन युनिट कम हो ।

नेपालमा हाईराइज अपार्टमेन्ट किनबेच अत्यन्तै कम हुने गरेको छ । धेरैको रोजाई आफ्नै व्यक्तिगत घर हुने गरेको छ । त्यसो त हाईराइज अपार्टमेन्ट निर्माण नै कम हुँदा पनि किनबेच सुस्त देखिएको विभागका एक अधिकारीले बताए  ।

०८० मा वैशाखदेखि माघसम्म १० महिनामा ३०२ युनिट मात्र अपार्टमेन्ट किनबेच भएका छन् । जबकी यसै अवधिमा चार लाख २५ हजार ९७९ घरजग्गा किनबेच भएका छन् । 

पछिल्लो तीन महिनायता घरजग्गा किनबेच निरन्तर उकालो लागिरहँदा अपार्टमेन्ट किनबेच भने घटेको छ ।

चालू वर्षमा सबैभन्दा धेरै अपार्टमेन्ट किनबेच भदौमा भएका छन् । सो महिना ४५ युनिट अपार्टमेन्ट बिक्री भएका थिए । 

भूमि विभागका अनुसार, वैशाखमा ३०, जेठमा २९, असारमा ३३, साउनमा ३०, भदौमा ४५, अशोजमा ३८, कात्तिकमा २२, मंसिरमा २२, पुसमा २८ र जेठमा २५ युनिट अपार्टमेन्ट किनबेच भएका छन् । 

माघ महिनामा लगनखेल मालपोतबाट नौ, डिल्ली बजारबाट ६, चावहिलबाट तीन, कलंकीबाट ४, टोखाबाट एक, पोखरामा दुई युनिट अपार्टमेन्ट किनबेच भएको भूमि विभागको तथ्यांक छ ।