सवा तीन अर्ब विदेशी लगानीमा बन्दै दुई बिजनेश कम्पलेक्स

काठमाडौं । सञ्‍चालनमै रहेका बिजनेश कम्पलेक्स व्यापार नभएर धमाधम खाली भइरहँदा नयाँ थपिने क्रम पनि जारी छ । काठमाडौं उपत्यकामात्र नभएर मोफसलमा पनि धमाधम सुविधा सम्पन्‍न बिजनेश कम्पलेक्स निर्माण भइरहेको देखिन्छ ।

यही क्रममा गत आर्थिक वर्ष बिजनेश कम्पलेक्स बनाउने भनेर दुईवटा कम्पनी दर्ता भएका छन् । पुरै विदेशी लगानी रहने भनिएका दुईवटै कम्पलेक्स काठमाडौंमा निर्माण हुने उद्योग विभागले जनाएको छ । 

दुईवटा बिजनेश कम्पलेक्समा कुल तीन अर्ब १४ करोड रुपैयाँ लगानी गर्ने प्रतिबद्धता जनाएका छन् । 

२४ जेठ ०८१ मा विदेशी लगानीको एस. एन्ड जे.जी. होल्डिङ्स नेपाल कम्पनी दर्ता भएको छ । यो कम्पनीले कमर्सियल भवन निर्माणमा तीन अर्ब रुपैयाँ लगानी गर्ने प्रतिबद्धता जनाएको छ । कम्पनीले एक लाख वर्गफिट क्षेत्रफलको बिजनेश कम्पलेक्स बनाउने बताएको छ ।

त्यसअघि ९ चैत ०८० मा नोर्चग तेसाङ कम्पनी दर्ता भएको छ । यो कम्पनीले बिजनेश कम्पलेक्स निर्माणमा १४ करोड विदेशी लगानी गर्ने प्रतिवद्धता जनाएको छ । यो बिजनेश कम्पलेक्सको कुल क्षेत्रफल २५  हजार वर्गफिट हुनेछ ।

पछिल्लो समयमा शहरी क्षेत्रमा कमर्सियल भवन निर्माणको लहर चलेको छ । दैनिक उपभोग्य सामाग्रीदेखि विभिन्‍न सेवा सुविधाहरु एउटै छानोमुनि उपलब्ध गराउने उद्देश्यले यस्ता भवन निर्माण भइरहेको देखिन्छ । पछिल्लो समय अफिसहरुलाई भाडामा दिन पनि धेरै कमर्सियल कम्पलेक्स बनिरहेको पनि देखिन्छ ।