नदी र खोला किनारका बासिन्दालाई सुरक्षित स्थानमा सार्ने सरकारको निर्णय

काठमाडौं । सरकारले नदी तथा खोला किनारमा बसोबास गरिरहेका परिवारलाई सुरक्षित स्थानमा बासोबासको व्यवस्था मिलाउने भएको छ । सोमबार बसेको मन्त्रिपरिषद बैठकले बाढीपहिरोबाट नदी तथा खोला किनारमा बसोबास गरिरहेकाहरू बढी प्रभावित भएको ठहर गर्दै उनीहरुलाई सुरक्षित स्थानमा सार्ने निर्णय गरेको हो ।

मन्त्रिपरिषद् वैठकले स्थानीय तह र प्रदेश सरकारसँग समन्वय गरेर नदी तथा खोला किनाराका परिवारलाई सुरक्षित स्थानमा सार्ने निर्णय गरेको हो । वर्षात्को समयमा आइरहने बाढीपहिरोबाट सबैभन्दा धेरै खोला किनारमा बस्ने प्रभावित हुँदै आइरहेको देखिएको छ ।

सरकारले बाढीपहिरो पीडितलाई उद्धार तथा राहतका लागि अर्थ मन्त्रालयले एक अर्ब रुपैयाँ उपलब्ध गराउने भएको छ । गत बिहीबारदेखि शनिबारसम्म परेको वर्षाका कारण मंगलबार बिहानसम्म २१९ जनाको मृत्यु भइसकेको छ । बाढीपहिरोबाट देशमा ठूलो धनजनको क्षति भएको छ ।

सरकारले एक साताभित्र लाभग्राही पहिचान गरेर अस्थायी आवास निर्माणका लागि पहिलो किस्तावापत २५ हजार रुपैयाँ प्रदान गर्ने भएको छ ।