बैंकमा थुप्रियो साढे ३८ अर्बको गैरबैंकिङ सम्पत्ति, कुन बैंकको कति ?

काठमाडौं । खराब कर्जा बढ्दै गएसँगै बैंक तथा वित्तीय संस्थाहरुमा गैरबैंकिङ सम्पत्ति (एनबीए) बढ्दै गइरहेको छ । ०८१ पुससम्म बैंकहरुमा३८ अर्ब ५९ करोड रुपैयाँबराबरको गैरबैंकिङ सम्पत्ति थुप्रिएको नेपाल राष्ट्र बैंकले जनाएको छ ।

कर्जा असुल नभएका ऋणीहरुको धितो लिलाम बिक्री गर्न नसकेपछि बैंक तथा वित्तीय संस्थाहरुमा गैरबैंकिङ सम्पत्ति डरलाग्दो गरी बढ्दै गइरहेको हो । 

बैंक तथा वित्तीय संस्थाहरुले कर्जा प्रवाह गर्दा घरजग्गा र सुन धितोमा राख्ने गर्छन् । घरजग्गा धितो राखेर कर्जा दिएका बैंकहरुका लागि त्यहि सम्पत्ति बोझ बन्न थालेको हो ।

नेपाल राष्ट्र बैंकका अनुसार ०८० असारसम्म बैंक तथा वित्तीय संस्थाहरुमा १८ अर्ब ६९ करोड रुपैयाँ बराबरको गैरबैंकिङ सम्पत्ति रहेको थियो । त्यो सम्पत्ति ०८१ साउनसम्म आइपुग्दा झन्डै दोब्बरले बढेर ३५ अर्ब ५१ करोडको पुगेको थियो । 

०८१ पुस मसान्तसम्म बैंक तथा वित्तीय संस्थाहरुमा गैरबैंकिङ सम्पत्ति बढेर कुल ३८ अर्ब ५९ करोड रुपैयाँ बराबरको थुप्रिन पुगेको छ । तथ्यांकले चालु आर्थिक वर्षको पहिलो ६ महिनामा करिव तीन अर्ब रुपैयाँ बराबरको गैरबैंकिङ सम्पत्ति बढेको देखिन्छ ।

बैंकहरुमा थुप्रिएको गैरबैंकिङ सम्पत्तिमध्ये सबैभन्दा धेरै वाणिज्य बैंकसँग रहेको देखिन्छ । कुल ३८ अर्ब ५९ करोडको गैरबैंकिङ सम्पत्तिमध्ये ३२ अर्ब ६६ करोडको वाणिज्य बैंकमा, तीन अर्ब ६६ करोडको विकास बैंकमा र दुई अर्ब २७ करोडको फाइनान्स कम्पनीसँग रहेको राष्ट्र बैंकले जनाएको छ ।

धेरै गैरबैंकिङ सम्पत्ति हुनेमा ग्लोबल पहिलो

सबैभन्दा धेरै गैरबैंकिङ सम्पत्ति ग्लोबल आइएमई बैंकमा थुप्रिएको देखिन्छ । नेपाल राष्ट्र बैंकका अनुसार ०८१ पुससम्म ग्लोबल आइएमई बैंकमा पाँच अर्ब १३ करोडको गैरबैंकिङ सम्पत्ति थुप्रिएको छ ।

चार अर्ब १४ करोडको गैरबैंकिङ सम्पत्ति थुप्रिएर एनआइसी एशिया बैंक दोस्रो नम्बरमा छ । यसअघि सबैभन्दा धेरै गैरबैंकिङ सम्पत्ति हुनेमा एनआइसी एशिया पहिलो नम्बरमा रहने गर्थ्यो ।

हिमालय बैंकमा तीन अर्ब ९१ करोडको गैरबैंकिङ सम्पत्ति थुप्रिएकोमा स्टान्डर्ड चार्टर्ड बैंकमा गैरबैंकिङ सम्पत्ति शून्य रहेको छ । नेपाल बैंकसँग २० करोड, राष्ट्रिय वाणिज्य बैंकमा ३० करोड, एभरेष्ट बैंकसँग ५२ करोड, सनराइज बैंकमा ७० करोड, सिटिजन्स बैंकमा ८१ करोडको गैरबैंकिङ सम्पत्ति थुप्रिएको देखिन्छ ।

अर्ब रुपैयाँभन्दा माथि गैरबैंकिङ सम्पत्ति थुप्रिने बैंकहरु १२ रहेका छन् । हिमालयन बैंकमा तीन अर्ब ९१ करोडको गैरबैंकिङ सम्पत्ति थुप्रिदा नेपाल इन्भेष्टमेन्ट मेगा बैंकमा तीन अर्ब चार करोड, नबिलमा दुई अर्ब ७० करोड, कुमारीमा दुई अर्ब ६७ करोडको गैरबैंकिङ सम्पत्ति थुप्रिएको छ ।

यस्तै, प्राइम बैंकमा एक अर्ब ७० करोड, लक्ष्मी बैंमा एक अर्ब ६० करोड, माछापुच्छ्रे बैंकमा एक अर्ब ६ करोड, प्रभु बैंकमा एक अर्ब ६ करोड, एनमबि बैंकमा एक अर्ब तीन करोड र कृषि विकास बैंकमा एक अर्बको गैरबैंकिङ थुप्रिएको छ ।