नौ महिनामा सवा दुई अर्बको सिमेन्ट निर्यात

काठमाडौं । भारतीय अवरोधकै बाबजुत पनि चालु आर्थिक वर्षको पहिलो नौ महिनामा दुई अर्ब १९ करोड रुपैयाँ बराबरको सिमेन्ट तथा क्लिंकर (अर्धप्रशोधित सिमेन्ट) निर्यात भएको छ ।

साउनदेखि चैतसम्मको अवधिमा १२ लाख ३६ हजार ४३६ टन सिमेन्ट र क्लिंकर भारततर्फ निर्यात भएको भन्सार विभागले जनाएको छ । 

जसमा ६४ करोड रुपैयाँ बराबरको चार लाख ८० हजार ७९४ टन क्लिंकर र एक अर्ब ५५ करोड रुपैयाँ बराबरको तयारी सिमेन्ट ७ लाख ५५ हजार ६४३ टन निर्यात भएको देखिन्छ ।

भारत सरकारले ब्युरो अफ इन्डियन स्टान्डर्ड (बीआइएस) नविकरण नगरिदिँदा सिमेन्टको निर्यात प्रभावित भएको हो । अर्घाखाँची, बालाजी लगायत सिमेन्टको बीआइएस नविकरण नहुँदा महिनौं निर्यात रोकियो । 

भारतले ढिलै भएपनि चैतमा बीआइएस नविकरण गरिदिएको हुनाले वैशाखमा सिमेन्टको निर्यात पुनः लयमा फर्किने अपेक्षा उद्योगीको छ ।