सीईले थापाथलीमा १० तले अपार्टमेन्ट बनाउँदै

काठमाडौं ।सीई कन्स्ट्रक्सन प्रालिले काठमाडौंको थापाथलीमा १० तलाको अपार्टमेन्ट बनाउने भएको छ । करीव दुई रोपनी जग्गामा निर्माण गरिने अपार्टमेन्टमा सक्दो सेवा सुविधाहरु उपलब्ध गराउने सीईका अध्यक्ष बिजय राजभण्डारीले बताए ।

१० तला अग्लो भवनमा ३४ देखि ४० वटासम्म फ्ल्याट हुनेछन् । एउटा फ्ल्याटको मूल्य २ करोडभन्दा बढी नै हुनेछ । फ्ल्याट आधुनिक सुविधा सम्पन्न हुनेछन् ।

अपार्टमेन्ट निर्माण सुरु नहुँदै बुकिङ भइसकेको अध्यक्ष राजभण्डारीले बताए । ‘प्राइम  लोकेसन भएकै कारणले होला सबै फ्ल्याट बुकिङ भइसकेका छन्’ उनी भन्छन्, ‘चाँडो भन्दा चाँडै निर्माण सम्पन्न गरेर हस्तान्तरण गर्ने छौं ।’

कम्पनीको तर्फबाट आवश्यक तयारी पुरा भइसकेको छ । तर सरकारी निकायबाट अझै निर्माणको स्वीकृति आइसकेको छैन । अहिले महानगरपालिका र नगरविकास दुबैबाट स्वीकृति लिनुपर्छ । स्वीकृति पाउने वित्तिकै भवन निर्माण सुरु गरिहाल्ने उनले जानकारी गराए ।
‘थोरै जग्गा हुनाले धेरै सुविधा उपलब्ध गराउन सम्भव छैन, फ्ल्याट सुविधा सम्पन्न नै हुनेछन’ राजभण्डारी भन्छन्, ‘अपार्टमेन्टमा जीम हल, ब्याडमिन्ट कोर्ट लगायत बेसिक सुविधा उपलब्ध गराइने छ ।’

रियलस्टेट, पूर्वाधार, जलविद्युतमा लगानी गरिरहेको सीई कन्स्ट्रक्सन रियल स्टेट व्यवसायको पायोनियर हो । सीईले हाइड्रोपावर, अपार्टमेन्ट कम्पलेक्स, हस्पिटल बिल्डिङ, होटल बिल्डिङ, अफिस एन्ड कमर्शियल बिल्डिङ, रेसिडेन्सियल कोलोनी, अपार्टमेन्ट लगायत निर्माण गरिरहेको छ ।