कोरोना प्रभाव : बैंकको घरजग्गा कर्जा घट्यो

बैंक तथा वित्तीय संस्थाहरुले घरजग्गा क्षेत्रमा लगानी गरेको कुल कर्जा रकम घटेको छ । चालु आर्थिक बर्षको माघ मसान्तसम्म बैंकको कुल लगानी ४ खर्ब १८ अर्ब २८ करोड रुपैयाँ रहेकोमा फागुनमा घटेर ४ खर्ब १६ अर्ब ९९ करोडमा झरेको छ । यो अवधिमा एक अर्ब रुपैयाँ कर्जा रकम घटेको हो ।

लगानीमा रहेको कर्जाको मोटोर रकम असुली हुनुु र नयाँ लगानी उल्लेख्य नभएमा आउटस्टान्डिङ लोनको आकार घट्ने नेपाल राष्ट्र बैंकका प्रवक्ता गुणाकर भट्टले बताए । 

कोरोना भाइरसको महामारी विश्वभरी फैलिन थालेपछि माघदेखि नै बैंकको लगानीमा संकुचन आएको थियो । फागुन महिनामा कोरोनाको प्रभाव बढ्दै गयो, जसले गर्दा बैंकको ऋण प्रवाहमै संकुचन आयो । चैतको सुरुवातदेखि आंशिक लकडाउन र ११ गतेदेखि पूर्ण लकडाउन गरिएको हुनाले चैत र बैशाखमा कर्जा लगानी ठप्पप्राय छ ।

अहिले अत्यावश्यक बाहेकका क्षेत्रहरु ठप्प छन् । घरजग्गा क्षेत्र अत्यावश्यक क्षेत्रमा नपर्ने हुनाले कारोबार ठप्प छ ।

चालु आर्थिक वर्षको ८ महिना (फागुन मसान्तसम्म) बैंकको घरजग्गामा ३२ अर्ब ४ करोड लगानी भएको छ । जबकी ७ महिनामै घरजग्गामा ३३ अर्ब ३३ करोड लगानी प्रवाह भइसकेको थियो । 

फागुन मसान्तसम्म बैंक तथा वित्तीय संस्थाहरुले प्रवाह गरेको कुल कर्जा ४ खर्ब १६ अर्ब ९९ करोड रुपैयाँमध्ये व्यक्तिगत होमलोनर्फत २ खर्ब ५९ अर्ब १८ करोड र रियलस्टेटतर्फ १ खर्ब ५७ अर्ब ८१ करोड रुपैयाँ ऋण प्रवाह भएको देखिन्छ ।

नेपाल राष्ट्र बैंकले १ करोड ५० लाख रुपैयाँ सम्मको घरकर्जालाई व्यक्तिगत आवासिय कर्जामा गणना गरेको छ । व्यक्तिगत र रियलस्टेट कर्जाका लागि सुविधा पनि फरक फरक छन् ।