घरकर्जामा कडाई गर्ने राष्ट्र बैंकको संकेत

काठमाडौं । नेपाल राष्ट्र बैंकले घरकर्जामा कडाई गर्ने शंकेत देखाएको छ । नेपाल राष्ट्र बैंकले चालु आर्थिक वर्षको मौद्रिक नीतिको पहिलो त्रैमासिक समिक्षा गर्दै बैंक तथा वित्तीय संस्थाहरुले प्रवाह गर्दै आइरहेको घरकर्जामा कडाई गर्ने शंकेत देखाएको हो ।

राष्ट्र बैंकका गभर्नर महाप्रसाद अधिकारीले व्यक्तिगत आवधिक कर्जा, शेयर धितो कर्जा र रियलस्टेट कर्जासम्बन्धि विद्यमान व्यवस्थामा पुनरावलोकन गर्न सकिने बताएका हुन् । 

कोभीड महामारीले लगानीका अन्य क्षेत्र खुम्चिएपछि सरकारले अनप्रडक्टिभ क्षेत्र भनेर परिभाषित गरेको शेयर र घरजग्गामा बढी लगानी ओइरिएको हुनसक्ने अनुमानमा राष्ट्र बैंकले कडाई गर्न थालेको हो ।  

‘बैंक तथा वित्तीय संस्थाहरुले धेरै पैसा घरजग्गा र सेयर बजारमा लगानी गरेपछि राष्ट्र बैंकले त्यस्तो कर्जामा कडाई गर्ने तयारी गरेको हो’ राष्ट्र बैंक स्रोतले भन्यो । 

पछिल्लो समय शेयर बजारले हरेक दिन नयाँ रेकर्ड राख्दै किर्तिमानी कारोबार गर्दै आइरहेको छ । भूमि व्यवस्थापन तथा अभिलेख विभागका अनुसार घरजग्गाको कारोबार पनि पछिल्ला दिनमा उछालिन थालेको छ ।

राष्ट्र बैंकले व्यक्तिगत आवधिक कर्जा, शेयर कर्जा र घरकर्जामा कडाई गर्ने भनेपनि के कसरी कडाई गर्ने भनेर स्पष्ट पारेको छैन ।