कति ब्याजदरमा पाइन्छ सञ्‍चय कोषको घर सापटी कर्जा ?

के तपाईंलाई थाहा छ, कर्मचारी सञ्चय कोषले आफ्ना सञ्‍चयकर्ताहरुलाई  आवासको व्यवस्था गर्न घर सापटी कर्जा दिन्छ नि !

यदि तपाईं सञ्‍चय कोषको सञ्‍चयकर्ता हुनुहुन्छ र घर बनाउनका लागि होमलोनको खोजीमा हुनुहुन्छ भने तपाईंका लागि कोषले दिने घर सापटी कर्जा सबैभन्दा उपयुक्त हुन सक्छ । सञ्‍चय कोषको कोषको कर्जा बैंक तथा वित्तीय संस्थाहरुको भन्दा तुलनात्मक रुपमा सस्तो पनि हुन्छ ।

कोषले ०७८ भदौ अन्तिमदेखि ६० औं बार्षिकोत्सव मनाउँदै सञ्‍चयकर्तालाई घरजग्गा खरिद कर्जा सेवा सुरुवात गरेको छ । आफ्ना सञ्‍चयकर्तालाई नयाँ घर निर्माण गर्न, घरको तला थप गर्न र घर खरिद गर्नका लागि कर्जा प्रवाह गर्ने सञ्‍चय कोषले जनाएको छ ।

कर्जाको ब्याजदर

कोषले घर सापटी र घर मर्मत सपाटी कर्जा ७.९० प्रतिशत ब्याजदर उपलब्ध गराइरहेको जनाएको छ । घर सापटी धितो मूल्यांकनमा नबढ्ने गरी बढीमा १ करोड रुपैयाँ लिन पाइन्छ । कोषका अनुसार १० बर्षभन्दा कम सेवा अवधि बाँकी भएका सञ्‍चयकर्ताको हकमा १२ बर्षको तलबमान र १० बर्षभन्दा बढी सेवा अवधि बाँकी भएका सञ्‍चयकर्ताको हकमा १५ बर्षको तलबमानलाई आधार बनाइन्छ ।

घर सापटी लिन चाहिने योग्यता

एक बर्ष नियमित कोष कट्टी गरेका र उमेर वा पदावधिको आधारमा २ बर्ष सेवा बाँकी रहेका सञ्‍चयकर्ताले घर सापटी लिन पाउँछन् ।  ग्रेस अवधिसहित अधिकतम २० बर्षसम्मका लागि घर सापटी लिन सकिन्छ।

सापटी प्रवाह

सापटी प्रवाह कम्तीमा २ किस्ता र घर निर्माणको हकमा कार्य प्रगतिको आधारमा अधिकतम ४ किस्ताको व्यवस्था गरिएको छ । प्रथम किस्ता ५० प्रतिशतसम्म हुनेछ, तर घर खरिदको हकमा भने एकमुष्‍ठ सापटी प्रवाह गरिने कोषले जनाएको छ ।

घर निर्माणको सन्दर्भमा कोषले डिपीसीको कार्य सम्पन्‍न भएपछि मात्र घर सापटी कर्जा प्रवाह गर्नेछ । एउटै धितोमा खामेसम्म पती पत्‍नी दुबै जनाको तलबमानबाट सापटी लिन सकिने व्यवस्था छ । सञ्‍चय कोषले आफ्नो वित्तीय स्रोतबाट सञ्‍चयकर्ताको सेवाकालिन आवश्यकता पूर्ति गर्नको लागि विशेष सापटी, शैक्षिक सापटी, घर सापटी, घर मर्मत सापटी र सञ्‍चयकर्ता सरल चक्र कर्जा जस्ता सापटी सुविधाहरु प्रदान गरिरहेको छ ।

यस्तै, मुनाफा रकमबाट सामाजिक सुरक्षण कोष खडा गरी प्रसुती स्याहार, क्रिया खर्च, दुर्घटना क्षतिपूर्ति र सञ्‍चयकर्ता स्वास्थ्योपचार योजना कार्यक्रम सञ्‍चालन गर्दै आइरहेको छ । कोषले विभिन्‍न जलविद्युत कम्पनीहरु माथिल्लो तामाकोशी, चिलिमे जलविद्युत कम्पनीद्बारा प्रवद्धित जलविद्युत आयोजनाहरु लगायतमा ऋण लगानी गरिरहेको छ ।

राष्ट्रिय ध्वजाबाहक नेपाल वायु सेवा निगमलाई अन्तर्राष्‍ट्रिय उडान गर्ने विमान खरिद गर्न पनि ऋण लगानी गरेको छ । कोषले अधिकांश शेयर स्वामित्व सञ्‍चयकर्ताहरुको रहने गरी बेतन कर्णाली जलविद्युत आयोजना निर्माण प्रकृयाको शुरुवात गरेको जनाएको छ ।

Image: Facebook