यस्तो बन्दैछ गौशालामा तीन तारे होटलसहितको भव्य ‘ट्रेड टावर’

काठमाडौं । ट्रेड टावर लिमिटेडले काठमाडौंको गौशालामा तारे होटलसहितको अर्को बहुउद्देस्‍य बिजनेश टावर निर्माण सुरु गरेको छ । पशुपतिनाथको दक्षिणतर्फ रिङरोडमा जोडिएको करीव ४ रोपनी जग्गा ३६ वर्षका लागि भाडामा लिएर ट्रेड टावर गौशाला निर्माण थालनी भएको हो ।

तीन तारे होटलसहितको यस परियोजना बिल्ड, वन, अप्रेसन एन्ड ट्रान्सफर (बुट) मोडलमा सञ्‍चालन गर्ने कम्पनीले जनाएको छ । 

ट्रेड टावरले २४ जेठ २०७९ मा उद्योग विभागबाट लगानीको स्वकृति लिई उद्योग दर्ता गरिसकेको छ । यस्तै, यस परियोजना निर्माणका लागि १७ पुस २०७८ मा भूमि पुजा सम्पन्‍न भएको थियो ।

६ तला अग्लो बहुउद्देस्य टावरमा ९६ बेडसहितको होटल सञ्‍चालनमा आउनेछ, जसमा ४४ करोड ८८ लाख रुपैयाँ लगानी गर्ने प्रस्ताव उद्योग विभागमा गरिएको छ । कुल पुँजीमध्ये ४० करोड ५१ लाख स्थिर पुँजी र ४ करोड रुपैयाँ चालु पुँजी हुनेछ ।

होटल र बिजनेश टावरमा गरी १८५ सिट क्षमताका विभिन्‍न रेष्टुरेन्ट पनि हुनेछन् ।  शतप्रतिशत नेपाली लगानी रहने ट्रेड टावर सञ्‍चालनमा आउँदा ६३ जनाले रोजगारी पाउने उद्योग विभागमा प्रतिवद्धता जनाएको छ ।

यो भवनको निर्माण कार्य अढाई वर्षभित्र सक्ने गरी निर्माण थालनी गरिएको थियो । अब दुई बर्षभित्र ट्रेड टावर गौशालाको निर्माण सम्पन्न गरेर सन् २०२४ भित्र व्यवसायिक सञ्‍चालनमा ल्याउने बताइएको छ । 

बेसमेन्ट पार्किङसहितको भवनमा भुइँ तल्ला र पहिलो तल्लामा करीव एक सय पसल कबल हुनेछन् । दोस्रो तल्लामा कर्पोरेट अफिस, बैंक, इन्स्योरेन्स लगायतका अफिस रहने बताइएको छ ।

यस्तै, तेस्रो तल्लामा एयरलाइन्स , कार्गो लगायतका कार्यालय रहनेछन् भने चौथो र पाँचौं तलामा पशुपतिनाथ देखिने गरी तीन तारे होटल सञ्‍चालनमा ल्याइने छ । पशुपति दर्शन र एयरपोर्ट आउने पर्यटकका लागि आवश्यक पिक अप एन्ड ड्रपसहितको होटल सञ्‍चालन गर्न लागिएको हो ।

त्यसभन्दा माथिको तलामा रेष्टुरेन्ट, मिटिङ हल, पार्टी प्यालेस लगायत सञ्‍चालनमा आउने बताइएको छ ।

ट्रेड टावर लिमिटेड कम्पनी, २०६७ सालमा स्थापना भई सञ्‍चालनमा रहेको छ । यस कम्पनीले लिजिङ एन्ड फाइनान्सिङ, होटेल, हाइड्रोपावर, घरजग्गा, अपार्टमेन्ट लगायत पूर्वाधारका परियोजना विकास तथा लगानी गर्ने गर्छ ।

यो कम्पनीले थापाथलीमा नेपाल खाद्य संस्थानको जग्गा भाडामा लिएर नेपालकै सबैभ्न्दा ठूलो सिंगल बिल्डिङ कम्पलेक्स निर्माण गरी १३ वर्षदेखि सञ्‍चालन गरिरहेको छ ।

यस्तै, ललितपुर भैंसेपाटीमा रेडिययो टावरसँगै जोडिएको १९० अपार्टमेन्ट निर्माण गरिसकेको छ । यस्तै, दरबारमार्गमा रहेको तीन तारे होटल ल्यान्डमार्क काठमाडौं यसै समूहको सहभागितामा निर्माण भई सञ्‍चालनमा छ ।

थापाथलीमा रहेको ट्रेड टावरमा निजी क्षेत्रको छाता संस्था नेपाल उद्योग परिसंघको मुख्यालय, विभिन्न कर्पोरेट हाउसका मुख्यालय, एनआइसी एशिया बैंकको मुख्यालय, ब्रिटिस कलेज, अन्य अफिसहरु, रेष्टुरेन्ट लगायत रहेका छन् ।