११ अर्ब लगानीमा बुढानिकलण्ठमा खुल्दै तीनवटा पाँचतारे होटेल

काठमाडौं । शहरका एलिट वर्गको व्यवस्थित आवास क्षेत्रका रुपमा पहिचान बनाएको बुढानिलकण्ठमा प्रिमियम लक्जरी होटेलको पनि हब बन्‍ने भएको छ ।

बुढानिलकण्ठमा ११ अर्ब रुपैयाँ लगानीमा तीनवटा पाँचतारे लक्जरी होटेल खुल्न लागेका हुन् । दुईवटा पाँचतारे ‘होटेल बुढानिलकण्ठ हेरिटेज’ र ‘होली डे इन’ यही वर्षभित्रै सञ्‍चालनमा आउने तयारीमा छन् ।

यस्तै, नेपालको चुरोट बजारमा साम्राज्य खडा गरेको बहुराष्ट्रिय कम्पनी सूर्य नेपालले पनि बुढानिलकण्ठमा पाँचतारे होटेल बनाउँदैछ ।

यसअघि नै बुढानिलकण्ठमा दुई रोपनी जग्गामा ६० करोड लगानी गरेर पबेरा बुटिक रिसोर्ट सञ्‍चालनमा आइसकेको छ । यस्तै, सिजी होल्डिङ्सका अध्यक्ष अरुण चौधरीले १५ रोपनी क्षेत्रफलमा ‘मेराकी रिट्रिट’ वेलनेस सेन्टर सञ्‍चालनमा ल्याएका छ । यो प्रिमियम लक्जरी वेलनेस रिजोर्ट हो ।

होटेल बुढानिलकण्ठ हेरिटेज

१ जनवरी २०२३ देखि सञ्चालनमा ल्याउने तयारी भइरहेको बुढानीलकण्ठ हेरिटेज निर्माणको अन्तिम चरणमा छ । होटेलको ७० प्रतिशतभन्दा बढी काम सम्पन्‍न भइसकेको बताइएको छ । करिव १३ रोपनी जग्गामा बनिरहेको होटेलको भवन ९ तलाको हुनेछ । होटेलमा १०२ वातानुकुलित कोठाहरु हुनेछन् ।

यो होेटेल सञ्‍चालनमा आउँदा दुई अर्ब ४० करोड रुपैयाँ लगानी हुने अनुमान छ । होटेलको व्यवस्थापनमा अन्तर्राष्ट्रिय चेन ल्याउने तयारी छ । चक्रपथबाट करिब पाँच किलोमिटर दूरीमा रहेको होटेलमा सिए दीपक पाण्डे, सेयर व्यवसायी अम्बिकाप्रसाद पौडेल, सिए नवराज बुर्लाकोटीलगायत विभिन्‍न क्षेत्रका व्यवसायीहरुको लगानी रहेको छ ।

फरेष्ट इनले भित्र्याउँदै 'होली डे इन'

होटेल इष्टर्न नेपालका अध्यक्ष समेत रहेका दीपक खड्काले बुढानिलकण्ठमा पाँचतारे होटेल सञ्‍चालन गर्न लागेका हुन् । यसै बर्षभित्र सञ्‍चालनमा ल्याउने लक्ष्य राखिएको होटेल बहुराष्ट्रिय होटेल कम्पनी आइएचजी होटेल एन्ड रिसोर्ट कम्पनीको प्रख्यात चेन ब्रान्ड ‘होली डे इन’ले व्यवस्थापन गर्नेछ ।

यो होटेलमा खड्काले दुई अर्ब ६० करोड रुपैयाँ लगानी गर्दैछन् । २६ रोपनी क्षेत्रफलमा बनेको यस होटेलमा ११५ कोठाहरु रहने बताइएको छ । उनको लगानीमा झापाको मेचीनगरमा ‘होटेल इस्टर्न नेपाल’ सञ्‍चालनमा आउँदैछ । २५० कोठाको होटेलमा एक अर्ब ६९ करोड रुपैयाँ लगानी हुने उद्योग विभागले जनाएको छ ।

सूर्य नेपाल बनाउँदै पाँचतारे

बहुराष्ट्रिय कम्पनी सूर्य नेपालले पनि बुढानीलकण्ठमा करिब ६ अर्ब लगानी गरेर पाँचतारे लक्जरी होटेल खोल्न लागेको छ । यो होटेलको आर्किटेक्चर डिजाइन समेत तयार भइसकेको छ ।

यस होटेलमा १९० कोठाहरु हुनेछन भने ४६५ सिट क्षमताको रेष्टुरेन्ट हुनेछ । होटेल सञ्‍चालनमा आउँदा ३०६ जनाले रोजगारी पाउनेछन् ।

सूर्य नेपालले १० असोज २०७८ मा बुढानिलकण्ठमा पाँचतारे होटल सञ्‍चालन गर्नका लागि उद्योग विभागमा ५ अर्ब ९९ करोवड रुपैयाँ लगानी स्वीकृत गरेको छ । यो लगानी पूर्ण रुपमा सूर्य नेपाल प्रालिको हुनेछ ।

सूर्य नेपालमा भारतको आइटिसी लिमिटेडको ५९ प्रतिशत र २ प्रतिशत बेलायती कम्पनी ब्रिटिस अमेरिका टोबाको (इन्भेष्टमेन्ट) लिमिटेड र बाँकी ३० प्रतिशत शेयर नेपाल व्यक्ति तथा संस्थानको रहेको छ ।

आइटिसीले प्रिमियम ब्रान्डमा पाँचतारे होटेल चेन सञ्‍चालन गर्दै आइरहेको छ । नेपालमा पनि आइटिसीकै कुनै प्रिमियम ब्रान्ड भित्र्याएर लक्जरी होटेल सञ्‍चालन गर्न लागिएको हो ।