दुई अर्ब लगानीमा भरतपुर एयरपोर्टको नयाँ टर्मिनल भवन बन्दै, प्रधानमन्त्रीद्धारा शिलन्यास

काठमाडौं । पुरानो टर्मिनल भवनले यात्रुको चाप थेग्‍न नसकेपछि चितवनको भरतपुर विमानस्थलमा आधुनिक सुविधायुक्त नयाँ टर्मिनल भवन निर्माण सुरु भएको छ । 

बिहीबार प्रधानमन्त्री पुष्पकमल दाहाल (प्रचण्ड)ले भव्य समारोहबीच टर्मिनल भवनको शिलन्यास गरे ।

टर्मिनल भवन निर्माणमा एक अर्ब ९२ करोड रुपैयाँ लगानी ७१ लाख रुपैयाँ लगानी लाग्‍ने भएको छ । टर्मिनल भवन निर्माणका लागि ६ चैत २०७० मा केसी–क्षमादेवी–प्रतिष्ठा कम्पनीसँग भ्याटबाहेक एक अर्ब २७ करोड ९१ लाख रुपैयाँमा ठेक्का सम्झौता भएको थियो ।

सम्झौतापत्र अनुसार ठेकेदार कमपनीले तीन वर्षभित्र टर्मिनल भवन निर्माण गरिसक्नुपर्ने छ । 

दुई तले नयाँ टर्मिनल भवन ७ हजार ७४९ वर्गमिटर क्षेत्रफलको हुनेछ । टर्मिनल भवन आधुनिक सुविधा सम्पन्‍न हुने र समयमै निर्माण सम्पन्‍न गरी सञ्‍चालनमा ल्याउने नेपाल नागरिक उड्डयन प्राधिकरणको लक्ष्य छ ।

यस्तै, विमानस्थलको धावनमार्ग समेत विस्तार गर्ने तयारी भइरहेको छ । सोही अनुरुप नयाँ टर्मिनल भवन निर्माण गर्न लागेको भरतपुर विमानस्थल कार्यालयले जनाएको छ । 

धावनमार्ग विस्तारका लागि नेपाली सेनाको घोडा प्रजनन केन्द्रलाई स्थानान्तरण गर्नुपर्ने हुन्छ । अहिले भरतपुरमा ११५८ मिटर लम्बाई र ३० मिटर चौडाइको धावनमार्ग छ । 

यदि धावनमार्ग विस्तार गरिएमा ठूला जहाजबाट पनि उडान गर्न सकिने छ भने इन्स्ट्रुमेन्ट फ्लाइट रुल (भिएफआर) प्रविधि जडान गरी रात्रीकालीन उडानसमेत हुनेछ ।