नारायणी किनारमा खुल्यो सामुद्रिक किनारको झल्को दिने रिसोर्ट

काठमाडौं । नवलपुर गैंडाकोटको कुसुमघाटस्थित नारायणी नदी किनारमा नयाँ रिसोर्ट सञ्‍चालनमा आएको छ । सिन्धुपाल्चोकको भोटेकोशी किनारमा चर्चित ‘सुकुटे बिच रिसोर्ट’ सञ्‍चालन गरिरहेका महेन्द्र सिंह थापाले मंगलबारदेखि गैंडाकोटमा ‘नारायणी बिच एड्भेन्चर रिसोर्ट’ सञ्‍चालनमा ल्याएका हुन् । 

गैंडाकोट नगरपालिकाकी उपमेयर शान्ति कोइरालाले रिसोर्टको उद्घाटन गर्दै यस क्षेत्रको समग्र विकासमा रिसोर्टले टेवा पुग्‍ने बताइन् । 

‘रिसोर्टले स्थानीय उत्पादनलाई खपत गर्नुपर्छ, यहाँका तरकारी र अन्‍नबालीलाई प्रयोगमा ल्याउनुपर्छ’ उनले भनिन् ‘रिसोर्टले गैंडाकोटको पर्यटनलाई माथि उठाउन भूमिका खेल्ने नै छ ।’

सञ्‍चालक थापाले गैंडाकोटमा पर्यटनको सम्भावना देखेर रिसोर्ट सञ्‍चालनमा ल्याएको बताए । झन्डै १५ करोड रूपैयाँ लगानी भइसकेको सोर्टमा २१ डिलक्स रुम रहेका छन् भने सातवटा थपिँदै छन् । रिसोर्टमा विशाल स्वीमिङ पुल र थाइल्यान्डकै जस्तो ‘जेट स्काइज’ पनि रहेको छ ।

विदेशतिर सामुद्रिक किनारमा हुने रिसोर्टकै थिममा नारायणी बिच एड्भेन्चर रिसोर्ट निर्माण गरिएको छ ।

चितवनको सौराहा, मेघौली र देवघाट क्षेत्रमा घुम्‍न आउने पर्यटनले अन्य क्षेत्रमा पनि घुम्‍ने चाहना राख्‍ने भएकोले नारायणी किनारमा अवस्थित गैंडाकोट क्षेत्रको पर्यटनलाई विकास गर्न सकिने सम्भावना आफूले देखेर रिसोर्ट सञ्‍चालनमा ल्याएको थापाको भनाई छ ।

याफ्टिङ र ट्रेकिङको अनुभवबाट रिसोर्ट व्यवसायमा आएका उनी ट्रकिङ एजेन्ट एशोसियसन अफ नेपाल (टान)का पूर्वअध्यक्ष समेत हुन् । उनले यसअघि नै नारायणी किनारमा ‘जेट बोट’ चलाउँदै आइरहेका छन् । अत्याधुनिक प्रविधिका जेट स्काइज र जेट बोट भित्र्याएर नारायणीमा पर्यटकलाइ सेवा दिने उनको तयारी छ ।

ठूलो लगानीको रिसोर्ट सञ्‍चालनमा आउँदा गैंडाकोट क्षेत्रको पर्यटन प्रवद्र्धन गर्नमा ठूलो भूमिका खेल्ने गैंडाकोट नगरपालिका वडा नम्बर ५ का अध्यक्ष रत्नप्रसाद सापकोटाले बताए ।