चोभारमै बन्‍ने भयो बञ्‍जी, स्वीङ र जिपलाइन, साहसिक पर्यटनको एकीकृत प्याकेज तयार हुँदै

काठमाडौं । साहसिक खेल बञ्‍जी, स्वीङ, जिपलाइन भन्‍ने वित्तिकै पोखरा, कुस्मा, भोटेकोशी वा धुलिखेलको याद आइहाल्छ । अझ स्काइ साइक्लिङ गर्न रहर जाग्यो भने पनि कुस्माको ‘द क्लिफ’मा कुदिहाल्नुपर्ने अवस्था छ ।

तर, अब बञ्‍जीदेखि स्काइ साइक्लिङसम्मका साहसिक गतिविधिहरु काठमाडौंभित्रै उपलब्ध हुने भएका छन् । जेबी एडभेञ्‍चर प्रालिले कर्तिपुरको चोभारमा होटेल, बञ्‍जी, स्वीङ, स्काइ साइक्लिङलगायत साहसिक मनोरञ्‍जनात्मक खेलहरुको एकीकृत प्याकेज सञ्‍चालनमा ल्याउने भएको छ । 

काठमाडौंका युवाहरुको घुम्न जाने चर्चित ठाउँ चोभारमा ३ अर्ब रुपैयाँ लगानीमा लक्जरी होटेलसहित साहसिक पर्यटकीय प्रडक्टहरु तयार हुने भएका हुन् । यसका लागि १९ वैशाखमा जेबी एडेभञ्‍चर प्रालि उद्योग विभागमा दर्ता भएको छ ।

शतप्रतिशत स्वदेशी लगानी रहने कम्पनीमा २ अर्ब ९३ करोड रुपैयाँ फिक्स्ड क्यापिटल र ७ करोड रुपैयाँ वर्किङ क्यापिटल रहने उल्लेख छ । 

परियोजनाअन्तर्गत चोभारमा ४६ कोठाको लक्जरी होटेल निर्माण हुनेछ, जहाँ ६० सिट क्षमताको रेष्टुरेन्ट हुनेछ । वार्षिक ५० हजारलाई बञ्जी र ७० हजारलाई जिपलाइन चढाउने कम्पनीको उद्देश्य छ ।

यस्तै, सिसाको पुलमा स्काइ वाक तथा रक क्लाइम्बिङको सुविधा पनि उपलब्ध गराउने कम्पनीले जनाएको छ । वार्षिक ७० हजारले स्काइवाक र ४० हजारले रक क्लाइम्बिङ गर्न सक्नेछन् ।  

बच्चाहरुका लागि विशाल चिल्ड्रेन पार्क पनि निर्माण गरिने भएको छ । चिल्ड्रेन पार्कले एक वर्षमा एक लाख बच्चहरुलाई सेवा दिने लक्ष्य छ ।

यो परियोजना सञलनमा आउँदा डेढ सय जनाले प्रत्यक्ष रोजगारी पाउनेछन् भने ५ सय केभीए क्षमताको प्रशारण लाइन आवश्यक पर्नेछ ।

ठूलो जनसंख्या बसोबास गर्ने काठमाडौं उपत्यकामा घुम्न जाने ठाउँहरु अत्यन्तै कम छन् । खुला ठाउँको अभावले मान्छे उकुसमुकस भएर बस्‍नुपर्ने अवस्था छ । केही वर्षअघि सञ्‍चालनमा आएको चन्द्रागिरी केवलकार स्वदेशी तथा विदेशी धेरैका लागि घुम्न जाने नयाँ थलो बनेको छ ।

पुरै उपत्यका छर्लङ्ग देखिने चन्द्रागिरी डाँडोमा लक्जरी रिसोर्टसहित जीपलाइन, केवलकार, चिल्ड्रेन पार्कलगायत सुविधा उपलब्ध छन् ।

काठमाडौंको कमलादीमा पनि ठूलो लगानीमा स्काइ वाक टावर बन्दैछ । यस्तै, तौदहबाट चम्पादेवी डाँडोमा केवलकार बनाइँदैछ भने गोदावरीबाट फुलचोकी डाँडोसम्म पनि केवलकार बनाउने योजना छ ।