धरहराभन्दा अग्लो बनाइँदै 'काठमाडौं भ्यु टावर', १४ तला थपेर २६ तले बनाउने तयारी

काठमाडौं । पुरानो बसपार्कमा निर्माण भइरहेको काठमाडौं भ्यु टावर २६ तलाको बनाउने तयारी भएको छ । अहिले १२ तलासम्म मात्रै निर्माण भएको टावरलाई १२ देखि १४ तला थप्‍ने तयारी भएको हो ।

यसअघि टावर २९ तलाको बनाउने तयारी गरिएको भएपनि ०७२ को भूकम्पपछि काठमाडौं महानगरपालिकाले १२ तला मात्र बनाउन स्वीकृति दिएको थियो ।

पुल्चोक इञ्‍जिनियरिङ क्याम्पसले भवन निर्माणको प्राविधिक जाँच गरेर अझै तला थप्‍न सकिने सुझावसतिको प्रतिवेदन महानगरलाई बझुाएको छ । भवन निर्माण मापदण्ड अनुसार नै भएकोले तला थप्न सकिने प्रतिवेदनमा उल्लेख छ । 

पुल्चोक इञ्‍जिनियरिङ क्याम्पसले बुझाएको प्रतिवेदन अध्ययन गरेर तला थप्न दिने तयारी महानगरको छ । तर, कति तला थप्न दिने भन्‍ने विषय प्रतिवेदन अध्ययन गरेपछि मात्रै यकिन हुने महानगरले जनाएको छ ।

पुल्चोक क्याम्पसले हालसम्म निर्माण भएको संरचना कस्तो छ ? निर्माण सामग्री कस्तो प्रयोग गरिएको छ ? मापदण्ड पुगेको छ कि छैन ? तला थप्न मिल्छ कि मिल्दैन ? कति तलासम्म थप्न मिल्छ ? भन्‍ने बारे अध्ययन गरेको हो । 

२०७२ कात्तिक २५ गते उपराष्ट्रपति नन्दबहादुर पुनले गगनचुम्बी काठमाडौँ भ्यू टावरको शिलान्यास गरेका थिए । सम्झौताबमोजिम २०७५ भदौमै भवन निर्माण सकिनुपर्ने थियो, तर २०८० जेठको मध्यसम्म आइपुग्दा बल्ल संरचना मात्र खडा भएको छ ।

२०६८ असार २६ मा नगरपरिषद् बैठकले पुरानो बसपार्कमा सार्वजनिक निजी साझेदारी (पीपीपी) मोडलमा बहुउद्देश्यीय टावर निर्माण गर्ने निर्णय गरेको थियो । जलेश्‍वर, स्वच्छन्द र बिकोइ विल्ड्र्सले ठेक्का पाएको छ ।

भ्यू टावर नेपाली कलासंस्कृति झल्किने किसिमको हुनेछ । ४० प्रतिशत भूभागमा टावर बनाइएको छ भने बाँकी भूभाग खुला छाडिएको छ ।

टावरमा दुईतले भूमिगत पार्किङ हुनेछ, जहाँ वैशाखदेखि नै निजी सवारी साधन पार्किङका लागि खुला भइसकेको छ । भूमिगत पार्किङ क्षेत्रमा ४ सय सवारी साधन अटाउँछन् । पहिलो तलामा बसपार्कको काउन्टर हुनेछ । दोस्रो तलामा सूचना डेस्क र तेस्रो तलामा अत्याधुनिक सिनेमा हल हुने बताइएको छ ।

भ्यु टावरमा बस पार्किङ, सिनेमा हल, थिएटर, स्वीमिङ पुल, बैंक, स्वास्थ्य सेवा प्रवाह गर्ने स्थान, रेस्टुरेन्ट, पुस्तकालय, बँगैचा, काठमाडौं महानगरको वडा कार्यालय लगायत राखिने बताइएको छ ।