सौर्य सिमेन्टले पनि सुरु गर्‍यो क्लिंकर निर्यात

काठमाडौं । सिरहाको मिर्चैयामा सञ्‍चालित शौर्य सिमेन्ट उद्योगले पनि सिमेन्ट तथा क्लिंकर (अर्धप्रशोधित सिमेन्ट) निर्यात सुरु गरेको छ । उद्योगले १६ मंसिरदेखि क्लिंकर निर्यात सुरु गरेको हो ।

शौर्य सिमेन्टका प्लान्ट हेड गुरुदयाल सिंह तथा सहायक महाप्रबन्धक विकास खड्काले रिबन काटेर निर्यातको सुरुवात गरेका छन् । तीन ठूला व्यवसायिक घरानाको करिव १६ अर्ब रुपैयाँ लगानीमा स्थापित उद्योगबाट उच्चस्तरको प्रविधिबाट सिमेन्ट तथा क्लिंकर उत्पादन हुँदै आएको छ । 

उदयपुरको चुनढुंगाबाट उत्पादन गरिएको क्लिंकर तथा सिमेन्टमा न्यून एमजीओ तथा उच्चस्तरीय चुनढुंगा सम्मिश्रण रहेको कम्पनीको दाबी छ । भारतका सिमेन्ट उद्योगमा सफल परीक्षणबाट स्वीकृत भएपछि क्लिंकर निर्यात गर्न थालेको कम्पनीले जनाएको छ । 

०७८ माघबाट उत्पादन थालेको उद्योगको दैनिक उत्पादन क्षमता ३ हजार टन रहेको छ । अहिले उद्योगले ५३ र ४३ ग्रेडमा ओपीसी तथा पीपीसी सिमेन्ट उत्पादन गर्दै आएको छ ।

पछिल्लो समय भारतीय सिमावर्ती क्षेत्रमा नेपालमा उत्पादित सिमेन्ट निर्यात बढ्दै गइरहेको छ । अहिले पाल्पा सिमेन्ट, अर्घाखाँची सिमेन्ट, बालाजी सिमेन्ट, सिजी पाल्पा सिमेन्ट, सर्वोत्तम सिमेन्ट र सौर्य सिमेन्टले आफ्नो उत्पादन भारतीय बजारमा पठाउन थालेका छन् । 

पछिल्लो चार महिनामा मात्रै पाँचवटा सिमेन्ट उद्योगले एक खर्ब १३ लाख रुपैयाँभन्दा बढीको सिमेन्ट तथा क्लिंकर निर्यात गरिसकेको भन्सार विभागको तथ्यांकले देखाउँछ । यो वर्ष ६/७ अर्ब रुपैयाँ बराबरको सिमेन्ट निर्यात हुने व्यवसायीको अनुभव छ ।