२०७९ को १० महिनामा ३७ अर्ब आठ करोड ५५ लाख रुपैयाँ राजश्व संकलन भएकोमा २०८० को १० महिनामा ३२ अर्ब ७९ करोड रुपैयाँमात्र राजश्व संकलन भएको छ ।
काठमाडौं । घरजग्गा कारोबार बढे पनि राजश्व संकलन घटेको छ । चालू वर्षको वैशाखदेखि माघसम्म गत वर्षको सोही अवधिको तुलनामा राजश्व संकलन करिव पाँच अर्ब रुपैयाँले घटेको छ ।
२०७९ को पहिलो १० महिनामा देशभरका मालपोतबाट ३७ अर्ब आठ करोड ५५ लाख रुपैयाँ राजश्व संकलन भएकोमा २०८० को १० महिनामा ३२ अर्ब ७९ करोड रुपैयाँमात्र राजश्व संकलन भएको छ ।
जबकी, यस अवधिमा घरजग्गा कारोबार र कित्ताकाट भने बढेको छ । गत वर्षको तुलनामा यस वर्ष घरजग्गाको लिखत पारित करिव ४७ हजारले बढेको छ ।
यस वर्ष वैशाखदेखि माघसम्म चार लाख २५ हजार ९७९ घरजग्गाको लिखत पारित भएकोमा गत वर्षको यसै समयमा तीन लाख ७७ हजार ७६४ घरजग्गाको लिखत पारित भएको थियो ।
यस्तै, गत वर्षको पहिलो १० महिनामा चार लाख ८३ हजार २१९ कित्ताकाट भएकोमा यस वर्षको सोही अवधिमा ९ लाख ७३ हजार ४४८ जग्गाको कित्ताकाट भएको छ ।
यस वर्ष सबैभन्दा बढी राजश्व असारमा चार अर्ब २७ करोड रुपैयाँ संकलन भएको छ । अशोजमा चार अर्ब ९ करोड रुपैयाँ राजश्व संकलन भएको थियो । अरु महिनाहरुमा चार अर्बभन्दा कम राजश्व संकलन हुँदै आएको देखिन्छ ।
वैशाखमा तीन अर्ब १० करोड, जेठमा तीन अर्ब ७६ करोड, साउनमा दुई अर्ब ९१ करोड, भदौमा तीन अर्ब पाँच करोड, कार्तिकमा दुई अर्ब १६ करोड, मंसिरमा दुई अर्ब ८६ करोड, पुसमा तीन अर्ब २० करोड र माघमा तीन अर्ब ३८ करोड रुपैयाँ राजश्व संकलन भएको छ ।
काठमाडौं उपत्यकासहित शहरी भेगमा महंगा पोपर्टी खरिद बिक्री कम हुँदा रजिष्ट्रेसन दस्तुर र पुँजीगत लाभकर कम उठेका कारण समग्रमा राजश्व संकलन घटेको देखिन्छ । गत वर्षको तुलनामाा यस वर्ष काठमाडौं उपत्यकामै घरजग्गा किनबेच कम भएको छ । काठमाडौं उपत्यका सबैभन्दा बढी मालपोत संकलन हुने क्षेत्र हो ।