चार आनाभन्दा बढी क्षेत्रफलमा घर बनाउँदा २० प्रतिशत जग्गा पार्किङका लागि अनिवार्य छुट्याउनुपर्ने काठमाडौं महानगरको नयाँ व्यवस्था
काठमाडौं । काठमाडौं महानगरपालिकाले घर तथा भवनमा निर्माणमा थप कडाई गरेको छ । अब पुरानो शहरी क्षेत्रमा जमिनमुनि एक तलामात्र र अन्य क्षेत्रमा दुई तलासम्म बेसमेन्ट निर्माण गर्न पाइने भएको छ ।
महानगरले १ वैशाखदेखि लागू हुने गरी ‘भवन निर्माण मापदण्ड २०८० था भवन संहिता’ जारी गरेको हो ।
घर बनाउँदा सवारी साधन पार्किङका लागि पनि अनिवार्य जग्गा राख्नुपर्ने व्यवस्था गरिएको छ । महानगरका जुनसुकै क्षेत्रमा जुनसुकै प्रयोजनका लागि चार आनाभन्दा बढी क्षेत्रफलमा निर्माण गरिने घर तथा भवनले २० प्रतिशत जग्गा पार्किङका लागि अनिवार्य छुट्याउनुपर्ने भएको छ ।
यसरी पार्किङको व्यवस्था गर्दा सडकको क्षेत्रात्रिकारमा नपर्ने गरी सेटब्याकमा पर्ने जग्गाको क्षेत्रफल समेत प्रयोग गर्न पाइने मापदण्डमा उल्लेख छ । यो व्यवस्था संरक्षित स्मारक उपक्षेत्रमा भने लागू हुने छैन ।
यस्तै, महानगर क्षेत्रभित्र निर्माण भई व्यवसायिक प्रयोजनमा उपयोग गरिएका भवनहरुले आफ्नो लागि आवश्यक पार्किङको व्यवस्था आफै गनुपर्नेछ ।
नयाँ मापदण्डमा घर तथा भवनको नक्सालाई दुई चरणमा स्वीकृत गर्ने व्यवस्था गरिएको छ । घरको प्लिन्थ लेवलसम्मको निर्माण पहिलो चरणमा र यसभन्दा माथिल्लो भागको अर्को चरणमा नक्सा स्वीकृत गरिने भएको छ । यो व्यवस्था सुरक्षित भवन निर्माणका लागि लागू गरिएको महानगरको भनाई छ ।