काठमाडौंमा घरवहाल कर १३ प्रतिशलते बढ्यो, उठ्यो पौने दुई अर्ब

काठमाडौं । काठमाडौं महानगरपालिका क्षेत्रभित्र घरवहाल कर १३ प्रतिशतले बढेको छ । चालू आर्थिक वर्षको साउनदेखि फागुनसम्म आठ महिनामा महानगरका ३२ वडा कार्यालयबाट एक अर्ब ६९ करोड ६३ लाख रुपैयाँ घरवहाल कर उठेको हो ।

गत आवको यसै अवधिमा काठमाडौं महानगरले एक अर्ब ५० करोड दुई करोड रुपैयाँ घरवहाल कर उठाएको थियो । यो वर्ष आठ महिनामा १९ करोड ६२ लाख रुपैयाँले घरवहाल कर बढेको हो । 

सम्पत्ती वहाल तथा पट्टा वापतको आयमा लाग्‍ने कर यस वर्ष एक रुपैयाँ पनि उठेको छैन । गत वर्ष यस्तो कर नौ करोड ७१ लख रुपैयाँ उठेको थियो । यस्तै, सम्पत्ती कर र भूमि तथा मालपोत कर पनि घटेको छ । आठ महिनामा सम्पत्ती कर ७५ करोड ३७ लाख र भूमि तथा मालपोत कर ९० लाख रुपैयाँ उठेको छ ।

नक्सापास दस्तुरमा ३५ प्रतिशतले कमी 

घर, भवन, टहरोलगायत संरचना निर्माण घटेपछि काठमाडौं महानगरको नक्सापास दस्तुर ३५ प्रतिशतले घटेको छ । गत वर्ष ६५ करोड ८६ लाख रुपैयाँ नक्सापास दस्तुर उठेकोम यस वर्ष ४२ करोड ६५ लाख रुपैयाँमात्र उठेको महानगरले जनाएको छ ।

आठ महिनामा पार्किङ शुल्क २७ प्रतिशतले बढेर ९५ लाख रुपैयाँ उठेको छ । व्यवसाय रजिष्ट्रेसन दस्तुर पाँच प्रतिशतले बढेर ४० करोड ४७ लाख रुपैयाँ उठेको छ । 

आठ महिनामा महानगरले कुल आन्तरिक राजश्‍व तीन अर्ब ७७ करोड ८४ लाख रुपैयाँ उठेको जनाएको छ । जुन गत वर्षको सोही अवधिको तुलनामा २.८७ प्रतिशतले धेरै हो । गत वर्ष ३ अर्ब ६७ करोड ३० लाख रुपैयाँ राजश्‍व उठेको थियो ।