आर्थिक सर्वेक्षण : कर्जा प्रवाह न्यून हुँदा घरजग्गा कारोबार बढ्न सकेन

काठमाडौं । बैंक तथा वित्तीय संस्थाहरुबाट कर्जा प्रवाह न्यून हुँदा घरजग्गा कारोबार विस्तार हुन नसकेको सरकारले स्वीकार गरेको छ । अर्थमन्त्री वर्षामान पुनले आइतबार संसदमा पेश गरेको आर्थिक सर्वेक्षण ०८०/८१ को तथ्यांकले घरजग्गा कारोबारमा शिथिलता कायमै रहेको देखाएको हो ।

घरजग्गा कारोबारमा कमी आएको भए तापनि निजी आवास तथा भाडाका क्रियाकलापमा भएको बढोत्तरीका कारण घरजग्गा कारोबार सेवा क्षेत्रको कुल मूल्य अभिवृद्धि बढ्ने अनुमान गरिएको छ ।
गत आर्थिक वर्ष यस क्षेत्रको कुल मूल्य अभिवृद्धि २.१८ प्रतिशतले बढेकोमा चालू आवमा २.९८ प्रतिशतले बढ्ने सरकारको अनुमान छ ।

चालू आवको कुल गार्हस्थ्य उत्पादनमा घरजग्गा कारोबार क्षेत्रको योगदान ८.३३ प्रतिशत रहने अनुमान गरिएको छ । गत आवमा यस्तो योगदान ८.२४ प्रतिशत रहेको थियो । पछिल्लो दशक यस क्षेत्रको योगदान वार्षिक औसत ८.७९ प्रतिशत र वृद्धिदर २.३० प्रतिशत रहेको छ ।