पूर्वी नाकाबाट एक वर्षमा ३२ करोड ६६ लाखको सिमेन्ट निर्यात

झापा । पूर्वी नाका काँकडभिट्टाबाट गत आर्थिक वर्षमा ३२ करोड ६६ लाख ५ हजार मूल्य बराबरको सिमेन्ट भारत निर्यात भएको छ।

मेची भन्सार कार्यालयका सूचना अधिकारी गणपति कँडेलकानुसार गत आर्थिक वर्ष ०८०/८१ मा पूर्वी नाका हुँदै ३२ करोड ६६ लाख ५ हजार मूल्य बराबरको ४९ हजार ९ सय ५९ मेट्रिकटन सिमेन्ट निर्यात भएको हो।

देशका विभिन्‍न नाकाबाट विगत दुइ वर्षअघिदेखि सिमेन्ट र क्लिंकर निर्यात हुँदै आए पनि यस नाकाबाट भने पहिलो पटक निर्यात भएको उनले जानकारी दिए। 

यस नाकाबाट निर्यात भएका सिमेन्ट भने झापामा उत्पादन नभएको सिमेन्ट व्यवसायीले बताएका छन्। झापामा रहेका आठवटा सिमेन्ट उद्योगमध्ये तीन वटा बन्द अवस्थामा रहेका छन्। चालु रहेका पाँचवटा उद्योगसमेत धरासायी अवस्थामा रहेको नेपाल उद्योग वाणिज्य संघका केन्द्रीय सदस्य उमेश डालमियाले बताए। 

उनले उत्पादनको ४० प्रतिशत सिमेन्ट खपत हुन नसक्दा उद्योगहरू बन्द हुने अवस्थामा पुगेका बताए। यहाँ उत्पादित ५० प्रतिशत सिमेन्ट विदेश निर्यात गर्न सके मात्र उद्योग सञ्‍चालन गर्न सकिने डालमियाको भनाइ छ।

'बिनाअध्ययन उद्योग खोल्न सरकारले अनुमति दियो, उद्योग थपिँदा उत्पादन बढी भयो तर विकास निर्माणका काम विगतभन्दा घटेकाले समस्या भएको छ। बजारमा माग घटेपछि उद्योग बन्द हुने अवस्थामा पुगेका हुन्', उनले भने, 'अब यहाँ उत्पादित सिमेन्टको बजार व्यवस्थापनका लागि ठोस् पहल नभएमा सबै उद्योग बन्द हुने अवस्थामा पुग्‍ने छन्। यसबारे सबै निकाय समयमै सचेत हुन आवश्यक छ।' रासस