पुस महिनामा साउनयताकै उच्च कित्ताकाट

काठमाडौं । घरजग्गा खरिद बिक्रीसँगै पुस महिनामा जग्गाको कित्ताकाट पनि बढेको छ । 

पुसमा देशभरि ५२ हजार १०८ कित्ता जग्गा कित्ताकाट भइ एक लाख १५ हजार १३४ कित्ता पुगेको भूमि व्यवस्थापन विभागले जनाएको छ । 

पुसमा भएको कित्ताकाट साउनयताकै उच्च हो । असारमा देशभर एक लाख ३६ हजार कित्ताकाट भएका थिए । साउनमा कित्ताकाट घटेर ९६ हजारमा खुम्चियो । भदौमा ६१ हजार, अशोजमा ७३ हजार, कार्तिकमा ७३ हजार र मंसिरमा एक लाख दुई हजार कित्ताकाट भएका थिए ।

भद्रपुरमा सबैभन्दा धेरै कित्ताकाट
झापाको भद्रपुर मालपोतबाट सबैभन्दा धेरै कित्ताकाट भएका छन् । पुसमा भद्रपुरबाट ३६ सय ६० कित्ताकाट हुँदा मोरङको बेलवारीबाट ३५ सय ८१, कैलालीको धनगढीबाट ३२ सय ७२ कित्ताकाट भएका छन् । 

सुनसरीको इनरुवाबाट ३२ सय १५, जनकपुरधामबाट २८ सय २८, बाराको कलैयाबाट २५ सय २३, पर्साबाट २५ सय १५, लगनखेलबाट २४ सय ८४, सप्तरीको राजविराजबाट २४ सय ४९ कित्ताकाट भएका छन् ।

यस्तै, काभ्रेमा २२ सय ४०, नेपालगञ्जमा २१ सय ५४, सिराहामा २१ सय ३६, चितवनमा दुई हजार ७१, झापामा दुई हजार ६, सर्लाहीको मलंगवामा १९ सय ९४, रुपन्देहीको भैरहवामा १९ सय ७१, भक्तपुरमा १९ सय ४८, रुपन्देहीकै बुटवलमा १८ सय ४० कित्ताकाट भएका छन् ।