चर्चित गायिका शान्तिश्री बनिन् भव्य घरकी मालिक्नी

काठमाडौं । अथक संघर्ष, लगनसिलता र मिहेनतले चर्चित लोकदोहोरी गायिका शान्तिश्री परियारको भव्य जीवन सुरु भएको छ । उनले लोकसंगीतको कमाईबाट हालै काठमाडौंको गोंगबु गणेशस्थानमा चार करोडको आलिसान घर खरिद गरेकी छन् । 

शान्तिश्री नेपालमा पनि कलाकर्मबाटै करोडौंको सम्पत्ती जोड्न सकिन्छ भन्ने ज्वलन्त उदाहरण हुन् । उनी पछिल्लो समयकी सर्वाधिक चल्तीकी  गायीका हुन् । उनका गीतले युट्युबमा किर्तीमानी भ्यूज बटुलेर नयाँ इतिहास रचेका छन् ।

उनको स्वर रहेको ‘रूकुम मैकोट’ छोटो समयमै युट्युबमा १० करोड भ्यूज पार गर्ने पहिलो नेपाली गीत बनेको छ भने उनकै स्वरको अर्को गीत ‘अरेली काँडैले’ पनि १० करोड भ्यूज पार गर्ने पहिलो नेपाली लोकगीत बनेर नयाँ रेकर्ड राखेको छ ।

युट्युब प्लेटर्फमा १० करोड भ्यूजको कीर्तिमानसँगै शान्तिश्रीको भव्य जीवनको सुरूवात पनि भएको छ । निरन्तरको संघर्ष र मेहेनतले एकदिन सफलताको शिखरमा पुगिन्छ भन्ने उनी ज्वलन्त उदाहरण बनेकी छन् । 

शान्तिश्री रोल्पाको दुर्गम गाउँमा निम्नमध्य वर्गीय परिवारमा जन्मेकी चेली हुन् । कुनै समय जीवन चलाउन गिट्टी कुट्नेदेखि लोकदोहोरी साँझमा गाउने गर्थिन् । उनको लोकदोहारी साँझबाट व्यवसायिक सांगीतिक यात्रा सुरुवात भएको थियो ।

अहिले उनलाई देशभरका मेलामहोत्सवमा मात्र होइन, विदेशमा समेत आफ्नो प्रस्तुती दिन भ्याइनभ्याई छ । पछिल्लो समय सर्वाधिक डिमान्डेड गायिका शान्तिश्रीका ‘बोल माया’, ‘गलबन्दी’, ‘अरेली काँडैले’, ‘रुकुम मैकोट’ सर्वाधिक सुपरहट गीत हुन् । यसका अलवा उनले दर्जनौं सुपरहिट गीत दर्शक स्रोतामाझ पस्किसकेकी छन् ।  

सामाखुसीमा भाडाको घरमा बस्दै आएकी उनी गोंगबुमा आफ्नै घरमा बसाइ सरिसकेकी छन् । उनको घर साढे दुई तलाको छ । घरमा सेतो र क्रिम कलर लगाइएको हुनाले नियोक्लासिकल शैलीको दरबार जस्तै देखिन्छ । दोहोरो मोहोडा हुनाले गेट पनि दुईतर्फ नै राखिएको छ ।