कम्पनीका अनुसार चार बडेरुम अपार्टमेन्ट ३६ सय वर्गफीट र डुप्लेक्स अपार्टमेन्ट ६५ सय वर्गफीट क्षेत्रफलको हुने छन् ।
काठमाडौं । काठमाडौंको केन्द्र मानिने नक्सालमा हाईइन्ट लक्जरी ‘स्काइवान अपार्टमेन्ट’ निर्माण सुरु भएको छ । एमसी समूह र केएल दुगड समूह साझेदार रहेको स्काइलाइन डेभलपर्सले करिव दुई अर्ब रुपैयाँ लगानीमा लक्जरी अपार्टमेन्ट निर्माण गर्न लागेको हो ।
कम्पनीले १४ युनिटको लक्जरियस अपार्टमेन्ट निर्माण गरिरहेको छ । १४ युनिटमध्ये ६ वटा डुप्लेक्स र आठवटा चार बेडरुम अपार्टमेन्ट हुनेछन् । चर बेडरुम अपार्टमेन्टको मूल्य ९–१० करोड र डुप्लेक्स युनिटको १६–१७ करोड रुपैयाँ मूल्य तोकिएको छ ।
कम्पनीका अनुसार चार बडेरुम अपार्टमेन्ट ३६ सय वर्गफीट र डुप्लेक्स अपार्टमेन्ट ६५ सय वर्गफीट क्षेत्रफलको हुने छन् । अपार्टमेन्ट परियोजना निर्माण सुरु नहुँदै करिव सबै युनिट बुकिङ भइसकेको कम्पनीले जनाएको छ ।
गत वर्ष नै निर्माण सुरु गरिएको अपार्टमेन्ट दुई वर्षभित्र निर्माण सम्पन्न गरेर ग्राहकलाई हस्तान्तरण गर्ने कम्पनीले लक्ष्य राखेको छ । चार रोपनी क्षेत्रफलमा निर्माण भइरहेको यो अपार्टमेन्ट ११ तलाको हुनेछ । यस्तै, डबल बेसमेन्ट पार्किङ सुविधा उपलब्ध हुनेछ ।
आलोक विद्याश्रम विद्यालय भत्काएर सोही जग्गामा अपार्टमेन्ट निर्माण थालिएको हो । अपार्टमेन्टमा इन्डोर हिटेड स्वीमिङ पुल, जिम हल, डबल हाइट लबी, कन्फ्रेन्स हल, गेमिङ जोन लगायत सुविधाहरु रहनेछन् ।
अपार्टमेन्टका कोठाहरुमा इटालियन मार्बलको फ्लोरिङ, आर्किटेक्चर पनि उच्च गुणस्तरणको प्रयोग गरिने बताइएको छ ।
महंगा अपार्टमेन्टमा आकर्षण
पछिल्लो समय काठमाडौं उपत्यकामा महंगा लक्जरी अपार्टमेन्ट निर्माण सुरु भएका छन् । ललितपुरको कुपण्डोलमा निर्माण भइरहेको समिट रेसिडेन्सेसमा एउटै अपार्टमेन्ट ३० करोडसम्म बिक्री भएको बताइन्छ ।
महंगो मूल्यका अपार्टमेन्ट पनि निर्माण सुरु नहुँदै पुरै बुकिङ भइसकेको सम्बन्धित निर्माण पक्षको भनाई छ । स्काईवान अपार्टमेन्ट पनि निर्माण सुरु नहुँदै सबै युनिट बिक्री भइसकेको कम्पनीले बताएको छ । यस्तै, समिट रेसिडेन्सेसका अधिकांश युनिट बिक्री भइसकेका छन् ।
०७२ को भूकम्पको घाउ विर्सिएर मानिसले गगनचुम्बी भवनको बसाई खोज्न थालेका छन् । यही मौकामा रियलस्टेट व्यवसायीहरु प्रिमियम लक्जरीयस अपार्टमेन्ट निर्माणमा जुटेका हुन् ।
यसअघि कहिल्यै रियलस्टेटमा लगानी नगरेका व्यवसायीहरुले पनि पछिल्लो समय अपार्टमेन्ट निर्माणमा हात हाल्ने घोषणा गरेका छन् । ०७२ पछि एउटै अपार्टमेन्ट निर्माण नहुँदा बिक्रीका लागि स्टक सकिइसकेका छन् । तर, अहिले उपत्यकामा बन्दै गरेका अपार्टमेन्ट मध्यमवर्गका लागि नभएर उच्चमध्यम र उच्चवर्गलाई लक्षित गरिएको छ ।
आरभी इन्भेष्टमेन्ट्सले ज्ञानेश्वरमा ४ करोड ४१ लाखदेखि १२ करोडसम्म पर्ने लक्जरियस अपार्टमेन्ट ‘आभ्रा भिल्लाज’ बनाउँदै छ । गुड कर्मा ग्रुपले महाराजगञ्जमा हाइइन्ड लक्जरी अपार्टमेन्ट ‘कर्मा रेसिडेन्सेस’ बनाउन सुरु गरेको छ भने डाँफे डेभलपर्सले रविभवनमा ५ करोडसम्म मूल्य पर्ने अपार्टमेनट निर्माण सुरु गरेको छ ।