कमलादीको स्काई वाक भ्यू टावर अंग्रेजी नयाँ वर्षदेखि सञ्‍चालनमा आउने

काठमाडौं । नेपालकै पहिलो स्काई वाक भ्यू टावर अंग्रेजी नयाँ वर्षदेखि सञ्‍चालनमा आउने भएको छ । काठमाडौंको कमलादीमा बनिरहेको स्काई टावर जनवरी २०२३ देखि सञ्‍चालनमा आउने भएको हो ।

कोभिड महामारीका कारण निर्माणमा ढिलाई भइरहेको स्काई टावरको काम अन्तिम चरणमा पुगेको वन्डर्स नेपालले जनाएको छ । अंग्रेजी नयाँ वर्षसम्म सर्वसाधारणलाई अवलोकनका लागि खुला गर्ने गरी टावर निर्माणको काम भइरहेको सञ्‍चालक दामोदर न्यौपानेले बताए ।  

अहिले टावरको माथि सिसा राख्‍ने र फिनिसिङको काम भइरहेको छ । टावरको भुइँमा पार्किङ, बगैँचा र  ३८ वटा सटर निर्माण गरिएको छ  । व्यापारिक सटरको बुकिङ समेत खुला गरिसकेको कम्पनीले जनाएको छ । 

स्काई टावर ७५ मिटर अग्लो हुनेछ, जसको टपका दुई तलामा सयभन्दा बढी क्षमताको रेष्टुरेन्ट हुनेछ । टावरमा राखिएका लिफ्टबाट भुईं तलाबाट सिधै ६८ मिटर उचाईमा पुगेर रोकिने छ । त्यहाँ सभा हल र रेस्टुरेन्ट हुनेछन् ।

टावरको सबैभन्दा माथिल्लो भागको भुइँमा पारदर्शी सिसाको बाटो बनाइनेछ, जहाँ हिँड्दा आकाशमै हिँडेको जस्तो अनुभूति हुनेछ । सिसा राखिएको ठाउँमा एक पटकमा पाँच सय जनासम्म चढ्न सक्नेछन् । दुईवटा लिफ्टबाट एकैपटक २४÷२४ जना मान्छे टावर चढ्न सक्नेछन् । 

स्काई टावर चढ्नको लागि प्रतिव्यक्ति एक हजार रुपैयाँ शुल्क लाग्‍ने सञ्‍चालक न्यौपानेले बताए । उपत्यकाको मुटुमा निर्माण गरिएको स्काई टावर मनोरञ्‍जनको केन्द्र बन्‍ने उनको विश्‍वास छ ।

स्काई टावर १८ महिनामा निर्माण सम्पन्‍न गरेर सञ्‍चालनमा ल्याउने लक्ष्यसहित २०७६ मंसिरमा शिलन्यास गरिएको थियो । तर, लगत्तै सुरु भएको कोभिड महामारीका कारण निर्माणमा ढिलाई भएको कम्पनीको दाबी छ ।

१३.२ रोपनी क्षेत्रफलमा बनेको टावरमा नेपाली भवनको ढाँचा अनुसार झन्डै २८ तला हुने छ । टावर निर्माणमा स्टिल स्ट्रक्चर प्रयोग गरिएको छ । टावर बनाउने जिम्मा अमर कन्स्ट्रक्सन र स्टिल स्ट्रक्चरको जिम्मा सेफ स्टिलले पाएका छन् ।

स्काई वाक टावरमा दैनिक साढे चार हजार जनालाई अवलोकन गारउन सकिने बताइएको छ । यो टावरमा ११ जना लगानीकर्ता साझेदार छन् । 

टावरमा अण्डरग्राण्डसहित १५० भन्दा बढी कार र ५ सयभन्दा बढी मोटरसाइकल पार्किङ गर्न सकिनेछ ।