कुपण्डोलमा एउटै फ्ल्याटको साढे १३ करोड पर्ने लक्जरी अपार्टमेन्ट बन्दै

काठमाडौं । ललितपुरको कुपण्डोलमा एउटै फ्ल्याटको साढे १३ करोड रुपैयाँसम्म पर्ने अपार्टमेन्ट निर्माण हुने भएको छ ।

आरभी ग्रुपले कुपण्डोलमा उच्चवर्गलाई लक्षित गर्दै प्रिमियम लक्जरियस ‘सांग्रिला अपार्टमेन्ट’ निर्माण गर्न लागेको हो । 

यही व्यवसायिक ग्रुपले काठमाडौंको ज्ञानेश्‍वरमा एउटै फ्ल्याटको साढे १४ करोडसम्म पर्ने प्रिमियम अपार्टमेन्ट ‘आभ्रा भिलाज अपार्टमेन्ट’ निर्माण गर्दैछ ।

दुबै अपार्टमेन्ट परियोजनाको बुकिङ खुला भइसकेको छ । ज्ञानेश्‍वरको अपार्टमेन्ट निर्माण सुरु भइसकेको छ भने कुपण्डोलको आगामी दशैं–तिहारपछि निर्माण सुरु गर्ने बताइएको छ ।

आरभी ग्रुपले कुपण्डोल कानदेवता थाननजिकै अपार्टमेन्ट बनाउन लागेको हो । तीन रोपनी क्षेत्रफलमा बन्‍ने अपार्टमेन्ट भवन १४ तलाको हुनेछ ।

अपार्टमेन्टमा साढे ७ सयदेखि ५ हजार वर्गफिटसम्मका ३६ युनिट उपलब्ध हुनेछन् । कम्पनीले साढे ७ सय वर्गफिटको अपार्टमेन्टलाई १ करोड ८० लाख रुपैयाँ मूल्य तोकेको छ । यो अपार्टमेन्टमा अधिकतम साढे १३ लाख मूल्यसम्मका अपार्टमेन्ट युनिट उपलब्ध हुनेछन् ।

रिङरोडभित्र सुविधा सम्पन्‍न अपार्टमेन्ट खोज्‍नेहरु लागि सांग्रिला अपार्टमेन्ट उपयुक्त विकल्प हुने आरभी ग्रुपको विश्‍वास छ । 

अपार्टमेन्ट निर्माणमा जग्गा बाहेक करिव एक अर्ब लाग्‍न सक्ने अनुमान गरिएको छ । हरेक फ्ल्याटबाट उपत्यकाको सुन्दर दृश्यावलोकन गर्न सकिने गरी अपार्टमेन्ट निर्माण गरिँदै छ ।

अपार्टमेन्टमा स्वीमिङ पुल, जिम, साउन, स्टिम, सामुदायिक हल, चिल्ड्रेन पार्क, अन्डरग्राउन्ड पार्किङ लगायत सुविधा हुनेछन् । 

सांग्रिला अपार्टमेन्टमा फ्ल्याट बुकिङका लागि ३० प्रतिशत रकम अग्रिम बुझाउनुपर्ने हुन्छ । कम्पनी आफैले फाइनान्सिङको सुविधा उपलब्ध गराउन बैंकसँग सहमति गरेको छ ।

यही समूहले भैंसेपाटी क्षेत्रमा ‘कार्यविनायक होम्स’ बनाइसकेको छ ।